கோறளைப்பற்று பிரதேச செயலகத்தில் அபிவிருத்தி உத்தியோகத்தர் ஒருவருடன் இராஜாங்க அமைச்சர் சதாசிவம் வியாழேந்திரன் முரண்பாட்டில் ஈடுபட்ட காணொளி ஒன்று பகிரப்பட்டு வருகிறது.
அமைச்சர் குறித்த அபிவிருத்தி உத்தியோகத்தரை கடமையை சரிவர செய்ய வேண்டும் என வலியுறுத்தியே இவ்வாறு முரண்பாட்டில் ஈடுபட்டதாக தெரிவிக்கப்படுகின்றது.
மக்கள் வெகு நேரமாக தங்களது தேவைகளை நிறைவேற்றிகொள்வதற்காக பிரதேச செயலகத்தில் காக்க வைக்கப்பட்டதாகவும், அதனால் இராஜாங்க அமைச்சர் மக்களுக்கான தேவைகளை நிறைவேற்றும் படி வலியுறுத்தியே அபிவிருத்தி உத்தியோகத்தருடன் முரண்பாட்டில் ஈடுபட்டதாக தெரிவிக்கப்படுகின்றது.
இச்சம்பவம் தொடர்பில் பிரதேச செயலக அதிகாரிகளினால் எவ்வித தகவல்களும் வெளியிடப்படவில்லை என்பது குறிப்பிடத்தக்கது.
இச்சம்பவம் தொடர்பில் தெரியவருவதாவது குறித்த பிரதேச செயலகத்தில் பெருமளவிலான மக்கள் காலையில் இருந்து பிரதேச செயலகம் ஊடாக விநியோகிக்கப்படும் அரிசிகளை பெற்றுகொள்வதற்காக வெகு நேரமாக காத்திருந்ததாகவும், இது தொடர்பில் உடனடியாக நடவடிக்கை எடுத்து பணிகளை வெகுவிரைவாக முன்னெடுக்குமாறு இராஜாங்க அமைச்சர் வலியுறுத்தியதாகவும் தெரிவிக்கப்படுகிறது.
