யாழ்ப்பாணத்தில் பெருமெடுப்பில் ஒழுங்குபடுத்தப்பட்ட பாடகர் ஹரிஹரனின் இசைநிகழ்ச்சி சீரான ஒழுங்குபடுத்தல் இன்மை காரணமாக இடைநிறுத்தப்பட்டுள்ளது.
நேற்று (09) இரவு 6:30 மணியளவில் ஆரம்பமான இந்த இசை நிகழ்வில் குழப்பம் ஏற்பட்ட காரணமாக, இரவு 9 மணியளவில் இந்த இசை நிகழ்ச்சியை ஏற்பாட்டு குழுவினர் இடைநிறுத்தியுள்ளனர்.
சரியான ஏற்பாடு இன்மை, பொலிஸாரின் பற்றாக்குறை மற்றும் கட்டுக்கடங்காத பார்வையாளர்கள் மேடைக்கு அருகில் கூடியதாலும் இந்த இசை நிகழ்ச்சி இடைநிறுத்தப்பட்டுள்ளது.
25000 ரூபா அனுமதிச் சீட்டு, 7000 ரூபா அனுமதிச் சீட்டு, 3000 ரூபாய் அனுமதிச் சீட்டு என கட்டணத்திற்கு ஒதுக்கப்பட்ட ஆசனங்களில் அமர்ந்தும் அதன் பின்னர் இலவசமாக நின்றவாறும் இசைநிகழ்ச்சியை பார்க்க ஏற்பாடு செய்யப்பட்டிருந்தது.
ஆனாலும் கட்டணத்திற்கு ஒதுக்கப்பட்ட ஆசனங்களில் பெரும்பாலான கூட்டம் அனுமதிச் சீட்டுகளே இல்லாமல் நுழைந்ததால் இந்த குழப்பம் ஏற்பட்டது.
முதியவர்கள், கைக்குழந்தைகளோடு வந்த பலர் பணத்தை செலுத்தியும் ஆசனங்களின்றி நின்றபடி இசை நிகழ்ச்சியை பார்க்க வேண்டிய அவலம் காணப்பட்டதாக பலரும் விசனம் தெரிவித்தனர்.
பெருமளவு தென்னிந்திய நட்சத்திர கலைஞர்கள் இந் நிகழ்ச்சிக்கு வந்தபோதும், போதிய அளவு பொலிஸ் பாதுகாப்பு வழங்கப்படவில்லை. இதனால் தடுப்புகள் உடைக்கப்பட்டு பலர் குறுகிய இடத்திற்குள் நுழைந்ததுடன்,தடுப்புகளை உடைத்துக்கொண்டு வரும்போது பணம் செலுத்தியும் கதிரைகள் இல்லாமல் நின்றவர்களோடு மோதுப்பட்டு பலர் நிலைதடுமாறி கீழே விழுந்த சம்பவங்களும் நடந்தது.
இதன் போது திரை நேரடி ஒளிபரப்பிற்காக கேமராவை இயக்கிக்கொண்டிருந்தவர் நின்றுகொண்டிருந்த தாங்கியில் முன்னே வந்தவர்கள் ஏறியதால், திரை நேரடி ஒளிபரப்பு நிறுத்தப்பட்டதுடன், பொலிஸாருக்கும் மற்றும் இளைஞர்களுக்கும் இடையில் வாக்குவாதம் ஏற்பட்டு, கைகலப்பு ஏற்பட்ட காணொளிகள் தற்போது சமூக வலைத்தளங்களில் பரவி வருகிறது.
அதேசமயம் அனுமதிச் சீட்டு கொள்வனவு செய்து நிகழ்ச்சியை பார்வையிட வந்தவர்களது பணம் மீள கொடுக்கப்படுமா அல்லது மீண்டும் இசைநிகழ்ச்சி யாழில் நடைபெறுமா என்பது குறித்த அறிவிப்பை ஏற்பாட்டு குழுவினர் அறிவிக்கவில்லை என்பதும் குறிப்பிடத்தக்கது.
