மாமனாரின் கொலை வழக்கில் பிணையில் விடுதலையாகி வந்து மாமியாரை கொலை செய்த மருமகன்;மட்டக்களப்பில் சம்பவம்!

கிரான் பிரதேச செயலாளர் பிரிவிலுள்ள வாகனேரியில் நேற்று முன்தினம் வெள்ளிக்கிழமை இரவு -23 இடம்பெற்ற கொலையொன்றில் குடும்பப் பெண் ஒருவர் சம்பவ இடத்திலேயே உயிரிழந்துள்ளார்.

கூழாவர்சேனை வாகனேரியைச் சேர்ந்த 5 பிள்ளைகளின் தாயான வை.கோமலம் வயது -45 என்பவரே கூரிய ஆயுதத்தினால் கழுத்தறுக்கப்பட்டு இவ்வாறு உயிரிழந்துள்ளார்.

சிறைசாலையில் இருந்து விடுதலையாகி வந்தவரான உயிரிழந்தவரின் மருமகனே இவ் கொலையினை புரிந்துள்ளதாக வாழைச்சேனை பொலிசார் தெரிவிக்கின்றனர்.

மத்திய கிழக்கு நாடொன்றில் வசித்து வரும் தமது மனைவி தன்னுடன் தொடர்பற்று காணப்படுவதாலும், அதேவேளை மனைவி அவருடைய அம்மாவுடன் தொலைபேசி மூலம் தொடர்பு வைத்துள்ளமையை அறிந்து கொண்ட பின்னர், நீண்ட நாட்காளாக மனைவி கதைக்காமல் இருந்த ஆத்திரத்தில் இவ் கொலையினை மேற்கொண்டுள்ளதாக விசாரணையில் மூலம் தகவல் தெரிவிக்கப்படுவதாக பொலிஸார் தெரிவிக்கின்றனர்.

கொலையாளி ஏற்கனவே 9 வருடங்களுக்கு முன்பு இதே போன்றதொரு கொலையினை புரிந்துள்ளதாகவும் அதாவது இதே போலவே தமது மாமனாரை தலைப் பகுதியில் கூரிய ஆயுதம் ஒன்றினால் தாக்கி கொலை செய்துள்ளதாக பிரதேச வாசிகள் தகவல் தெரிவிக்கின்றனர்.

இதற்காக அவர் மட்டக்களப்பு சிறைச்சாலையில் தண்டனை அனுபவித்து வந்த நிலையில் கடந்த ஒரு வாரத்திற்கு முன்பு சிறைசாலையில் இருந்து விடுதலையாகி வீடு வந்து சேர்ந்துள்ளார்.இவ்வாறான நிலையில் இக் கொலை இடம்பெற்றுள்ளது.

சந்தேக நபர் தலைமறைவாகியுள்ளதாகவும் பொலிசார் அவரை கைது செய்வதற்காக தேடுதல் பணியில் ஈடுபட்டுள்ளதுடன் மேலதிக விசாரணைகளை மேற்கொண்டு வருகின்றனர்.