நுவரெலியா, வட்டவளை பகுதியில் உள்ள வீடொன்றிற்குள் நுழைந்து 2 இலட்சம் ரூபா பணத்தை திருடியதாக கூறப்படும் பாடசாலை மாணவர்கள் இருவர் வட்டவளை பொலிஸாரால் கைது செய்யப்பட்டுள்ளனர்.
வட்டவளை பொலிஸாருக்கு கிடைத்த முறைப்பாட்டின் அடிப்படையில் மேற்கொள்ளப்பட்ட விசாரணையில் சந்தேக நபர்கள் இருவரும் கைது செய்யப்பட்டதாக பொலிஸார் தெரிவித்தனர்.
13 வயதுடைய இரண்டு மாணவர்களே இவ்வாறு கைது செய்யப்பட்டுள்ளனர்.
இவர்கள் இருவரும் கடந்த மே மாதம் 28 ஆம் திகதி அவர்களது வீட்டிற்கு அருகில் உள்ள மற்றுமொரு வீடொன்றின் கதவை திறந்து உள்ளே நுழைந்து 2 இலட்சம் ரூபா பணத்தைத் திருடியுள்ளதாக பொலிஸ் விசாரணையில் தெரியவந்துள்ளது.
பின்னர், இவர்கள் இருவரும், திருடிய பணத்தைப் பயன்படுத்தி கையடக்கத் தொலைப்பேசி , கிரிக்கெட் மட்டை , 8 புறாக்கள் மற்றும் 2 மீன் தொட்டிகள் உள்ளிட்ட பொருட்களைக் கொள்வனவு செய்துள்ளதாக விசாரணையில் மேலும் தெரியவந்துள்ளது.
இந்நிலையில், இவர்கள் இருவரிடம் 20 ஆயிரம் ரூபா பெறுமதியான கையடக்கத் தொலைப்பேசியை 80 ஆயிரம் ரூபாவுக்கு விற்பனை செய்ததாகக் கூறப்படும் கடை உரிமையாளர் ஒருவரும் சந்தேகத்தின் பேரில் கைது செய்யப்பட்டதாக பொலிஸார் தெரிவித்தனர்.
விசாரணையில் சந்தேக நபர்களிடமிருந்து 12 ஆயிரம் ரூபா பணம் கைப்பற்றப்பட்டதாக பொலிஸார் தெரிவித்தனர்.
சந்தேக நபர்கள் இருவரையும் நீதிமன்றில் ஆஜர்ப்படுத்த நடவடிக்கை எடுக்கப்பட்டுள்ளதாக பொலிஸார் மேலும் தெரிவித்தனர்.
