மட்டக்களப்பு படுவான்கரைப் பிரதேசத்தையும்,வாழ்வியலையும் மையப்படுத்தி “Visual Art Movies” நிறுவனத்தினால் உருவாக்கப்பட்டுள்ள “போடியார்” திரைப்படம் தொடர்பாக விளக்கமளிக்கும் ஊடக சந்திப்பு கடந்த வியாழக்கிழமை (01) மட்டக்களப்பு கல்லடி கிறீன் கார்டன் விருந்தினர் விடுதியில் இடம்பெற்றது.
இதன்போது “Visual Art Movies” நிறுவனம் இலங்கைத் தமிழ் சினிமாவை வர்த்தக ரீதியாக வளர்ப்பதுடன், எமது மொழி, கலை மற்றும் கலாசாரங்களைப் பாதுகாப்பதற்கும், இளம் கலைஞர்களை ஊக்குவிப்பதற்கு செயற்படும் வகையிலும் ஏற்படுத்தப்பட்டதாகத் தெரிவிக்கப்பட்டது.
போடியார் திரைப்படத்தை குடும்பநல வைத்திய நிபுணர் பேராசிரியர் க.அருளானந்தம், கிழக்குப் பல்கலைக்கழக சௌக்கிய பராமரிப்பு விஞ்ஞானபீட சிரேஷ்ட தயாரிப்பாளர் சதா சண்முகநாதன் மற்றும் “விசுவல் ஆர்ட் நிறுவன உரிமையாளர் ப.முரளிதரன் ஆகியோர் இணைந்து தயாரித்து இருந்தனர்.
இவ் மண்வாசனையை வெளிக் கொணரும் திரைப்படத்தில் ஜனா, ஜே.ஜே.நெலு, கிரேஸ், சுஜானி உட்படப் பலர் நடித்துள்ளனர்.
ப. முரளிதரன் அவர்களால் கதை திரைக்கதை, வசனம் எழுதப்பட்டிருந்ததுடன், இப் படத்தினை கோடிஸ்வரன் இயக்கியிருந்தார். புஷ்பகாந்த் அவர்களினால் படப்பிடிப்புக்கான எடிட்டிங் பணிகளும், யு.து. சங்கர்ஜன் அவர்களினால் இசையமைப்பு பணிகளும் செய்யப்பட்டு தற்போது படத்திற்கான வெளியீட்டு நிகழ்வுகளும் இடம்பெற்றுவருகிறது.
இத்திரைப்படத்தின் வெள்ளோட்டம் மட்டக்களப்பு விஜயா திரையரங்கில் எதிர்வரும் 23,25,26 ஆம் திகதிகளில் நடைபெறவுள்ளதாகத் தெரிவிக்கப்பட்டது.
இந்நிலையில் மாவட்டத்திலுள்ள பொதுமக்கள் வருகை தந்து திரைப்படத்தைப் பார்வையிடுவதுடன், இத் திரைப்படம் தொடர்பான எவ்வித கருத்துக்களையும் பகிர்ந்து இத்துறை சார்ந்து எங்களை ஊக்குவிக்குமாறு கேட்டுக்கொண்டனர்.
