எல்ல பகுதியிலுள்ள வனப்பகுதிக்கு தீ வைத்தவர் கைது!

எல்ல பொலிஸ் பிரிவில் கினலன் பகுதிக்கு அருகிலுள்ள வனப்பகுதிக்கு தீ வைத்த சந்தேகநபர் ஒருவரை கைதுசெய்துள்ளதாக எல்ல பொலிஸார் தெரிவித்தனர்.

கடந்த 24ஆம் திகதி கினலன் பகுதிக்கு அருகிலுள்ள வனப்பகுதிக்கு தீ வைத்ததாக சந்தேகிக்கப்படும் நபரை நேற்று (25) வேறு ஒரு வனப்பகுதிக்கு தீ வைக்க முற்பட்ட போது கைதுசெய்துள்ளதாகப் பொலிஸார் தெரிவித்தனர்.

எல்ல கினலன் தோட்டத்தை சேர்ந்த 32 வயதுடைய ஒருவரே கைது செய்யப்பட்டுள்ளதாக பொலிஸார் தெரிவித்தனர்.

சந்தேக நபர் வனப்பகுதிகளுக்கு தீ வைப்பதாக கிடைக்கப்பெற்ற இரகசிய தகவலுக்கு அமைய சந்தேக நபரை பின் தொடர்ந்தபோது அவர் மேலுமொரு வனப்பகுதிக்கு தீ வைக்க முற்பட்டவேளையில் கைதுசெய்யப்பட்டுள்ளதாக பொலிஸார் தெரிவித்தனர்.

குறித்த தீயினால் சுமார் 15 ஏக்கர் காடு எறிந்து நாசமாகி உள்ளதாக அனர்த்த முகாமைத்துவ அதிகாரி ஒருவர் தெரிவித்தார்.

சந்தேக நபரை பண்டாரவளை நீதிவான் நீதிமன்றத்தில் ஆஜர்படுத்துவதற்கான நடவடிக்கைகளை மேற்கொண்டு வருவதாக எல்ல பொலிஸார் தெரிவித்தனர்.