காலி, இரத்கம பொலிஸ் நிலையத்தில் கடமையாற்றிய பொலிஸ் பரிசோதகர் ஒருவரை கொலை செய்வதற்கு உதவி செய்ததாக கூறப்படும் கலஹெட்டிஆராச்சிகே திமுத்து சம்பத் என்ற “பொடி திமுத்து” என்பவர் கட்டுநாயக்க விமான நிலையத்தில் வைத்து நேற்றுமுன்தினம் திங்கட்கிழமை (21) கைது செய்யப்பட்டுள்ளார்.
“பொடி திமுத்து” என்பவர் கலபட பிரதேசத்தைச் சேர்ந்த 28 வயதுடையவர் ஆவார்.
இவர் சார்ஜாவிலிருந்து நேற்றுமுன்தினம் (21) அதிகாலை 03.00 மணியளவில் கட்டுநாயக்க விமான நிலையத்தை வந்தடைந்துள்ளார்.
இதன்போது, விமான நிலையத்திலிருந்த குடிவரவு மற்றும் குடியகல்வு திணைக்கள அதிகாரிகளும் குற்றப் புலனாய்வு திணைக்கள அதிகாரிகளும் இணைந்து இவரை கைது செய்துள்ளனர்.
இதனையடுத்து, கைது செய்யப்பட்ட சந்தேக நபர் மேலதிக விசாரணைகளுக்காக கொழும்பு பொலிஸ் குற்றப் புலனாய்வு திணைக்களத்தில் ஒப்படைக்கப்பட்டுள்ளார்.
இவர் கடந்த 2023 ஆம் ஆண்டு ஒக்டோபர் மாதம் 09 ஆம் திகதி அன்று இரத்கம பொலிஸ் நிலையத்தில் கடமையாற்றிய பொலிஸ் பரிசோதகர் ஒருவரை சுட்டுக் கொலை செய்வதற்கு உதவி செய்துள்ளதாக பொலிஸார் தெரிவித்தனர்.
