2027ஆம் ஆண்டுக்கான வரவு செலவுத் திட்டத்தின் ஊடாக உழைக்கும் போது செலுத்தும் வரி (PAYE) அறவிடப்படும் வருமான வரம்பை மேலும் உயர்த்துவதற்கு நடவடிக்கை எடுக்கப்படும் என ஜனாதிபதி அநுர குமார திசாநாயக்க தெரிவித்துள்ளார்.
கொழும்பில் இன்று (07) நடைபெற்ற தேசிய தொழிற்சங்க மாநாட்டில் உரையாற்றியபோதே ஜனாதிபதி இதனைத் தெரிவித்துள்ளார்.
தமது அரசாங்கம் ஆட்சிக்கு வந்த பின்னர், ஒரு இலட்சம் ரூபாய் மாத வருமானம் பெறுவோருக்கும் உழைக்கும் போது செலுத்தும் வரி அறவிடப்பட்ட நிலையை மாற்றி, ஒரு இலட்சத்து 50 ஆயிரம் ரூபாய் வருமானம் பெறுவோருக்கு மாத்திரம் குறித்த வரி பொருந்தும் வகையில் நடவடிக்கை எடுத்ததாக ஜனாதிபதி குறிப்பிட்டார்.
இந்த வருமான வரம்பை எதிர்வரும் 2027ஆம் ஆண்டுக்கான வரவு செலவுத் திட்டத்தின் ஊடாக மேலும் அதிகரித்து, மக்களுக்கு கூடுதல் வரிச் சலுகைகளை வழங்க எதிர்பார்த்துள்ளதாகவும் அவர் தெரிவித்தார்.
இதேவேளை, 2027ஆம் ஆண்டுக்கான வரவு செலவுத் திட்டத்தின் மூலம் அரச ஊழியர்களுக்கான அத்தியாவசிய கொடுப்பனவுகளை நூறு சதவீதம் அதிகரிக்க நடவடிக்கை எடுக்கப்படும் என்றும் ஜனாதிபதி அறிவித்துள்ளார்.
அத்துடன், பொது அரச சேவையாளர்களின் அடிப்படைச் சம்பளத்தை அதிகரிப்பதற்கான அடுத்த கட்ட நடவடிக்கையும் 2027ஆம் ஆண்டு வரவு செலவுத் திட்டத்தின் ஊடாக முன்னெடுக்கப்படும் எனக் குறிப்பிட்டார்.
அரச ஊழியர்களுக்கான சில கொடுப்பனவுகளை அதிகரிப்பது தொடர்பில் ஏற்கனவே பல்வேறு கருத்துக்கள் முன்வைக்கப்பட்டு வருகின்றன. எனினும், அத்தியாவசிய கொடுப்பனவுகளை அதிகரிப்பதற்கே அரசாங்கம் நடவடிக்கை எடுக்கவுள்ளதாகவும், ஏனைய சில கொடுப்பனவுகள் தொடர்பில் தீர்மானங்கள் எடுக்கப்பட மாட்டாது என்றும் ஜனாதிபதி தெரிவித்துள்ளார்.
மேலும், 2028ஆம் ஆண்டில் அடிப்படைச் சம்பளத்தை மீண்டும் அதிகரிக்க வேண்டிய தேவை இருக்காது என்பதால், அந்த ஆண்டில் கொடுப்பனவுகளை அதிகரிப்பது தொடர்பில் கவனம் செலுத்தப்படும் எனவும் ஜனாதிபதி அநுர குமார திசாநாயக்க தெரிவித்துள்ளார்.
