தேசிய மக்கள் சக்தியின் வேட்ப்பாளர் கிருஷ்ணகோபால் திலகநாதனுக்கு ஆதரவு தெரிவிக்கும் வகையில் பிரச்சார நடவடிக்கையானது நேற்றுமாலை(31) செங்கலடி பிரதேசத்தில் பிரதேச தேசிய மக்கள் சக்தியின் ஆதரவாளர்களால் முன்னெடுக்கப்பட்டது.
இதன்போது வளமான நாடு அழகான வாழ்க்கைக்காக திசை காட்டியை வெல்லச் செய்வோம் என்ற தலைப்பிலான துண்டுப் பிரசுரங்கள் செங்கலடி வர்த்தக நிலையங்கள் மற்றும் பொதுமக்களுக்கு வழங்கி வைக்கப்பட்டது.
இந் நிகழ்வில் தேசிய மக்கள் சக்தியின் உறுப்பினர்கள் பலர் கலந்து கொண்டனர். இதன்போது தேசிய மக்கள் சக்தியின் வேட்பாளர் கிருஷ்ணகோபால் திலகநாதன் ஊடகங்களுக்கு கருத்து தெரிவிக்கையில் தெரிவித்ததாவது,
மட்டக்களப்பு மாவட்டத்தில் பல்வேறுபட்ட மக்கள் சார்ந்த பிரச்சினைகள் காணப்படுகின்றன. அவற்றில் மதவனை மயிலத்தமடு மேச்சல் தரை பிரச்சினை தொடர்பாக அறிக்கைகளை நாளை (01.11.2024) மட்டக்களப்பிற்கு தேசிய மக்கள் சக்தியின் தேசிய நிறைவேற்றுக் குழு உறுப்பினர் சுனில் கெந்தனட்டி வருகை தரவுள்ளார். அவரிடம் இவ் அறிக்கையினை சமர்பிக்கவுள்ளோம்.
இது போன்று மாவட்டத்தில் காணி தொடர்பான பல்வேறுபட்ட பிரச்சினைகள் உள்ளன. அது மட்டுமல்லாது மக்களின் அடிப்படை வசதிகள் சார்ந்த பிரச்சினைகள் என்பன தொடர்பாக எங்களால் அமைக்கப்பட்ட வட்டார சபைகளின் ஊடாக ஆய்வினை மேற்கொண்டிருக்கிறோம். இது தொடர்பான விடயங்களை ஜனாதிபதியின் கவனத்திற்கு கொண்டு வரவுள்ளோம். அரசியல் கைதிகள் தொடர்பான விடயங்களில் தேசிய மக்கள் சக்தி மிகவும் ஆர்வமாகவுள்ளது. ஈஸ்ரர் குண்டு தாக்குதல் தொடர்பான விடயங்கள் எல்லாம் தற்போது கவனத்தில் கொள்ளப்பட்டு அதற்கான நடவடிக்கைகள் தொடர்பாக ஆராயப்பட்டு வருவதாக அவர் ஊடகங்களுக்கு இதன்போது தெரிவித்தார்.
