நேற்றிரவு வடகொழும்பு, கதிரானவத்தை பிரதேசத்திலே, தமிழ் முற்போக்கு கூட்டணி தலைவர், மனோ கணேசனும் அவர் சக கொழும்பு மாவட்ட வேட்பாளர், ARV லோஷனும், ஆதரவாளர்களுடன் வீடு வீடாக சென்று துண்டுப்பிரசுரங்கள் விநியோகித்து பிரசாரம் செய்து கொண்டிருந்த போது, அவர்களது பிரசாரக் குழுவை நோக்கி திடீரென ஒரு பாரந்தூக்கி இயந்திரம் பின்பக்கமாக வந்து மோதியுள்ளது.
இரவு 8 மணியளவில் இந்தச் சம்பவம் இடம்பெற்றுள்ளதுடன், இருபுறமும் வீடுகள் அமைந்த ஓர் ஒடுங்கிய அந்த ஒழுங்கையில் இருந்த குறுகிய பாதையில் நடந்து சென்று கொண்டிருந்த போது, முன்புறமாக இருந்து பின்னோக்கி (reverse) வந்த வாகனம் மோதியதில், மனோ கணேசனுக்கு முன்னால் சென்று கொண்டிருந்த அவரது சாரதியும் தற்போதைய தனிப்பட்ட பாதுகாவலருமான ரத்நாயக்க கீழே விழுந்துள்ளனர்.
அந்தப் பாரந்தூக்கியின் பாரிய சக்கரங்கள், பாதங்களின் மேல் ஏறி நசுக்கியதன் காரணமாக உடனே அவர்கள் கொழும்பு அவசர சிகிச்சைப் பிரிவுக்கு எடுத்துச் செல்லப்பட்டு சிகிச்சை பெற்று வருகின்றனர்.
இந்நிலையில் சம்பவ இடத்துக்கு விரைந்த மட்டக்குளிய பொலிஸ் நிலைய போக்குவரத்துப்பிரிவு பொறுப்பதிகாரி கருணாரத்ன உட்பட்ட அதிகாரிகள் உடனடியாக அந்தப் பாரந்தூக்கியை அப்போது
செலுத்திய ஓட்டுநரையும், அவர் பணிபுரியும் நிறுவனத்தின் (Galaxy Steels) உரிமையாளரையும் பொலிஸ் நிலையத்துக்கு அழைத்துச் சென்றுள்ளனர்.
இந்நிலையில் இந்தச் சம்பவம் தற்செயலாக நடந்த ஒரு விபத்தா? அல்லது மனோ கணேசன் குறிவைக்கப்பட்டாரா ? அல்லது அவரது சக வேட்பாளர் லோஷன், அல்லது ஆதரவாளர்களை அச்சுறுத்த நடந்த ஒரு திட்டமிடப்பட்ட செயலா என்பது குறித்து சகல கோணங்களிலும் விசாரணைகள் நடத்தப்பட்டு வருவதாக மேலும் தெரிவிக்கப்படுகிறது.
இந்நிலையில் அந்தச் சம்பவத்தைத் தொடர்ந்து உடனடியாக பிரசார நடவடிக்கைகளை நிறுத்திய மனோ கணேசன், சக வேட்பாளர் லோஷனையும் அழைத்துக்கொண்டு கொழும்பு அவசர சிகிச்சைப் பிரிவுக்குச் சென்று அங்கே சிகிச்சை பெற்றுவரும் தனது சாரதியும் தனிப்பட்ட பாதுகாவலருமான ரத்நாயக்கவைப் பார்வையிட்டார்.
இந்த சம்பவம் தொடர்பில் வேறு எவருக்கும் காயங்கள் ஏற்படவில்லை என்பதும் மேலும் குறிப்பிடத்தக்கது.
