எங்களது விடுதலைப் போராட்டத்தில் மக்களை கொன்று குவித்தவர்களை தமிழ் மக்கள் அவ்வளவு எளிதில் மறந்து விட மாட்டார்கள் என மட்டக்களப்பு மாவட்டத்தில் தமிழரசுக்கட்சி சார்பில் போட்டியிடும் வைத்தியர் இளையதம்பி சிறிநாத் தெரிவித்துள்ளார்.
ஊடகமொன்றின் நிகழ்ச்சியில் கலந்துகொண்டு கருத்து தெரிவிக்கையிலேயே அவர் இவ்வாறு குறிப்பிட்டுள்ளார்.
இங்கு தொடர்ந்தும் கருத்து தெரிவித்த அவர்,
“எல்லா சிங்கள தலைவர்களும் தென்னிலங்கை வாக்கு அரசியலை நம்பியே இருக்கின்றனர்.
அந்த வகையில் தமிழ் மக்கள் ஒற்றுமையாக விழிப்புடன் இருந்து தென்னிலங்கை தேசிய கட்சிகளை முற்றாக நிராகரிக்க வேண்டும்.
நாம் ஒரு சிறுபான்மை மக்கள் என்ற காரணத்தினால் எம்மால் எம்முடைய பிரதிநிதிகளால் சில விடயங்களை சாதிக்க முடியாமலுள்ளது.
தென்னிலங்கையில் மாற்றம் ஏற்பட்டாலும் தமிழ் மக்கள் சில விடயங்களை மறந்து போய்விடக் கூடாது.
தமிழ் மக்களின் வலிகளுக்கு வருத்தத்தை கூட தெரிவிக்காத அனுர குமார திசாநாயக்கவை நாம் புகழ முடியாது. இவ்வாறான தலைவரால் தமிழ் மக்களுக்கு ஒன்றும் செய்து விட முடியாது” என்றார்.
