தமிழ் மக்கள் விடுதலைப் புலிகள் கட்சியின் தலைவரும், முன்னாள் பாராளுமன்ற உறுப்பினருமான சிவனேசதுரை சந்திரகாந்தன் (பிள்ளையான்), தமிழரசுக்கட்சி பாராளுமன்ற உறுப்பினர் சாணக்கியனுக்கு 50,000 ரூபா வழங்கவேண்டும் என கல்கிசை மாவட்ட நீதிமன்றம் (23) உத்தரவிட்டுள்ளது.
இது தொடர்பில் மேலும் தெரியவருகையில்,
சாணக்கியன், தனக்கு அவதூறான கருத்து வெளியிட்டதாக கூறி கல்கிசை மாவட்ட நீதிமன்றத்தில் சிவனேசதுரை சந்திரகாந்தன் வழக்குத் தாக்கல் செய்துள்ளார்.
வழக்கு தொடர்பில், இன்று சாணக்கியன் கல்கிசை மாவட்ட நீதிமன்றத்தில் முன்னிலையாகியதுடன், சாணக்கியன் சார்பில் ஜனாதிபதி சட்டத்தரணி சுமந்திரனுக்கு ஆஜராகியிருந்தார்.
இந்தநிலையில் வழக்குத் தாக்கல் செய்த சிவனேசதுரை சந்திரகாந்தன் நீதிமன்றத்தில் ஆஜராகாத காரணத்தினால், இவ்வழக்கை விசாரணைக்கு எடுத்துக்கொள்ள இந்த நீதிமன்றத்துக்கு உடைமையாக்கும் அதிகாரம் இல்லை என்ற வாதத்தை சுமந்திரன் முன்வைத்தார்.
வழக்கு விசாரணைக்கு தேவையான ஆவணங்கள் மற்றும் கோப்புக்கள் சமர்ப்பிக்கப்படாத காரணத்தால், வழக்குத் தாக்கல் செய்த சிவனேசதுரை சந்திரகாந்தன் அவர்கள், இன்றைய வழக்கு செலவினமாக எதிர்த்தரப்புக்கு 50,000 ரூபாவினை வழங்க வேண்டும் என நீதிமன்றம் உத்தரவிட்டுள்ளது.
அதேசமயம் இவ்வழக்கின் அடுத்த வழக்கு விசாரணை ஏப்ரல் 22 ஆம் தேதிக்கு ஒத்திவைக்கப்பட்டுள்ளது.
