இலங்கைப் பிரஜைகளுக்கு நெதர்லாந்தில் வேலைவாய்ப்புகளைப் பெற்றுத் தருவதாகக் கூறி மோசடிகள் இடம்பெற்று வருவதாகவும், இவ்வாறான மோசடி முயற்சிகள் தொடர்பில் பொதுமக்கள் எச்சரிக்கையுடன் செயற்படுமாறும் நெதர்லாந்து தூதுவராலயம் அறிவித்துள்ளது.
நெதர்லாந்தில் வேலைவாய்ப்புகளைப் பெற்றுத் தருவதாக வாக்குறுதியளித்து சில தரப்பினர் மக்களை ஏமாற்றி வருவதாகவும், இவ்வாறான மோசடிகள் தொடர்பில் முறைப்பாடுகள் கிடைத்துள்ளதுடன், ஏற்கனவே சிலர் இவற்றில் சிக்கியுள்ளதாகவும் தூதுவராலயம் தெரிவித்துள்ளது.
குறிப்பாக, நெதர்லாந்து குடிவரவு மற்றும் குடியகல்வு சேவையால் (IND) வெளியிடப்படும் உத்தியோகபூர்வ கடிதங்களைப் போன்ற போலி ஆவணங்கள் தயாரிக்கப்பட்டு பரப்பப்படுவதாகவும் சுட்டிக்காட்டப்பட்டுள்ளது.
நெதர்லாந்து அரசாங்கம் அனைத்து வகையான வேலைவாய்ப்புகளுக்கும் தொழில் விசாக்களை வழங்குவதில்லை எனவும், குறிப்பிட்ட சில தொழில் துறைகளுக்கு மாத்திரமே அனுமதி வழங்கப்படுவதாகவும் தூதுவராலயம் தெளிவுபடுத்தியுள்ளது.
குறிப்பாக, உயர் திறன் மற்றும் மேம்பட்ட தொழில்நுட்பம் சார்ந்த துறைகளில் உண்மையான வேலைவாய்ப்புகள் கிடைக்கக்கூடும் எனக் குறிப்பிட்டுள்ள தூதுவராலயம், ஏனைய வேலைவாய்ப்பு வாக்குறுதிகள் தொடர்பில் மிகுந்த எச்சரிக்கையுடன் இருக்குமாறும் வலியுறுத்தியுள்ளது.
மேலும், நெதர்லாந்தில் வேலைவாய்ப்புகளைப் பெற்றுக்கொடுப்பதற்காக எந்தவொரு நபரையும் தூதுவராலயம் பரிந்துரைப்பதோ அல்லது ஆட்சேர்ப்பு செய்வதோ இல்லை எனத் தெரிவித்துள்ளது.
எனவே, வேலைவாய்ப்பு தொடர்பில் எந்தவொரு பணப் பரிவர்த்தனையையும் மேற்கொள்வதற்கு முன்னர், சம்பந்தப்பட்ட வேலை வழங்குநரை நேரடியாகத் தொடர்புகொண்டு வேலைவாய்ப்பின் உண்மைத்தன்மையை உறுதிப்படுத்திக்கொள்ளுமாறும் இலங்கையர்களிடம் தூதுவராலயம் கேட்டுக்கொண்டுள்ளது.
