ஹெரோயின் போதைப்பொருளுடன் கைது செய்யப்பட்ட சந்தேக நபர் ஒருவர் நீதிமன்றில் ஆஜர்படுத்தப்பட்ட பின்னர் முச்சக்கரவண்டியில் பொலிஸ் நிலையத்திற்கு அழைத்து செல்லப்பட்ட போது கைவிலங்குடன் தப்பிச் சென்றுள்ளதாக காலி பொலிஸார் தெரிவித்தனர்.
இந்த சம்பவம் நேற்று புதன்கிழமை (29) இடம்பெற்றுள்ளது.
தப்பிச் சென்ற சந்தேக நபர் காலி, பூஸா பிரதேசத்தில் வசிக்கும் 29 வயதுடையவர் ஆவார்.
இது தொடர்பில் தெரியவருவதாவது,
காலி-வெல்லபட பிரதேசத்தில் ஹெரொயின் மற்றும் ஐஸ் போதைப்பொருட்களுடன் இரண்டு சந்தேக நபர்கள் காலி பொலிஸாரால் கைது செய்யப்பட்டுள்ளனர்.
கைது செய்யப்பட்ட சந்தேக நபர்கள் இருவரும் காலி நீதவான் நீதிமன்றத்தில் நேற்றைய தினம் (29) ஆஜர்படுத்தப்பட்ட போது, சந்தேக நபர்களை நாளை வெள்ளிக்கிழமை (31) வரை விளக்கமறியலில் வைக்குமாறு நீதிமன்றம் உத்தரவிட்டுள்ளது.
இதனையடுத்து பொலிஸ் அதிகாரிகள் சிலர் இணைந்து சந்தேக நபர்கள் இருவரையும் முச்சக்கரவண்டியில் காலி பொலிஸ் நிலையத்திற்கு அழைத்துச் சென்று கொண்டிருந்த போது சந்தேக நபர்களில் ஒருவர், கைவிலங்கிலிருந்த மற்றைய சந்தேக நபரின் கையை வெளியே எடுத்துவிட்டு கைவிலங்குடன் தப்பிச் சென்றுள்ளதாக பொலிஸார் தெரிவித்தனர்.
தப்பிச் சென்ற சந்தேக நபரை கைது செய்வது தொடர்பில் காலி பொலிஸார் விசாரணைகளை முன்னெடுத்து வருகின்றனர்.
