சொகுசு மோட்டார் வாகனம் ஒன்றைக் கொள்வனவு செய்தமை மற்றும் அதற்கான மாதாந்த குத்தகைக் கொடுப்பனவுகளைச் செலுத்தியமைக்குப் பயன்படுத்தப்பட்ட பணத்தின் மூலத்தைக் கண்டறிவது தொடர்பான விசாரணைகளின் அடிப்படையில், பெண் பொலிஸ் அதிகாரி ஒருவர் எதிர்வரும் 6ஆம் திகதி வரை விளக்கமறியலில் வைக்கப்பட்டுள்ளார்.
குற்றப் புலனாய்வுத் திணைக்களத்தினரால் (CID) கைது செய்யப்பட்ட பிரதம பொலிஸ் பரிசோதகர் (CIP) வருணி போகஹவத்த, நேற்று (03) மாத்தறை நீதிவான் நீதிமன்றத்தில் ஆஜர்படுத்தப்பட்டார். இதன்போது அவரை எதிர்வரும் வெள்ளிக்கிழமை (06) வரை விளக்கமறியலில் வைக்க நீதிமன்றம் உத்தரவிட்டுள்ளது.
கொட்டவில பொலிஸ் நிலையத்தின் நிர்வாகப் பிரிவுக்குப் பொறுப்பான அதிகாரியாகப் பணியாற்றிய அவரிடமிருந்து சொகுசு மோட்டார் வாகனம் ஒன்றையும் அண்மையில் குற்றப் புலனாய்வுத் திணைக்கள அதிகாரிகள் கைப்பற்றியுள்ளனர்.
மாத்தறை கூட்டுறவுச் சங்கத்தில் இடம்பெற்றதாகக் கூறப்படும் 100 கோடி ரூபாவுக்கும் அதிகமான நிதி மோசடியுடன் தொடர்புடையதாகச் சந்தேகிக்கப்படும் நபர் ஒருவரே குறித்த வாகனத்திற்கான மாதாந்த குத்தகைக் கொடுப்பனவுகளைச் செலுத்தி வந்துள்ளதாக ஆரம்பகட்ட விசாரணைகளில் தெரியவந்துள்ளது.
மேலும், குறித்த பொலிஸ் அதிகாரியின் மாதாந்த சம்பளம் சுமார் 1 இலட்சத்து 40 ஆயிரம் ரூபாவாக உள்ள நிலையில், அவர் பயன்படுத்திய சொகுசு வாகனத்திற்கான மாதாந்த குத்தகைக் கொடுப்பனவு மாத்திரம் 1 இலட்சத்து 32 ஆயிரம் ரூபாவாக இருந்துள்ளதாக விசாரணையாளர்கள் சுட்டிக்காட்டியுள்ளனர்.
இதனையடுத்து, வாகனத்தைக் கொள்வனவு செய்வதற்கும் அதன் குத்தகைக் கொடுப்பனவுகளைச் செலுத்துவதற்கும் பயன்படுத்தப்பட்ட நிதி எங்கிருந்து பெறப்பட்டது என்பது தொடர்பில் குற்றப் புலனாய்வுத் திணைக்களத்தினர் விரிவான விசாரணைகளை முன்னெடுத்து வருகின்றனர்.
குறித்த நிதி மோசடி விவகாரத்துடனான தொடர்புகள் மற்றும் வாகனக் கொள்வனவுக்கான பணத்தின் மூலத்தைக் கண்டறிவதே இந்த விசாரணைகளின் முக்கிய நோக்கமாக உள்ளதாகத் தெரிவிக்கப்படுகிறது.
