கல்குடா கல்வி வலயத்திற்குட்பட்ட பேத்தாழை சந்திரகாந்தன் வித்தியாலயத்தில் தரம் ஒன்றில் புதிதாக மாணவர்களை இணைந்து கொள்ளும் முகமாக மாணவர்களை வரவேற்கும் வித்தியாரம்ப நிகழ்வு, வித்தியாலய அதிபர் க.கதிர்காமநாதன் தலைமையில் நேற்று (30) நடைபெற்றது.
இதன்போது பாடசாலையின் வளாகமானது வாழைமரம் மற்றும் தோரணங்கள் கட்டப்பட்டு அலங்கரித்து காட்சியளித்தது.
கலாச்சார நிகழ்வுகளுடன் தரம் 2 மாணவர்கள் ஒவ்வொருவரும் தங்களது கையில் வைத்திருந்த மலர்மாலையை புதிய மாணவர்களுக்கு அணிவித்து தோழமையுடன் கைகளை பிடித்தவாறு வகுப்பறைக்கு அழைத்துச் சென்றனர்.
வகுப்பறையில் அதிதிகள் மற்றும் மாணவர்களால் மங்கள விளக்கேற்றல் நிகழ்வு இடம்பெற்று, இறைவணக்கத்துடன் மாணவர்களின் வரவேற்பு நடனமும் இடம்பெற்றது.
அதேசமயம் அதிபர், மாணவர்களை வரவேற்று ஆசியுரையாற்றியதுடன், நிகழ்வில் அயல் பாடசாலை அதிபர் மற்றும் முன்னாள் அதிபர்கள் கலந்து கொண்டு மாணவர்களுக்கு பாராட்டுகள் தெரிவித்து, ஆசி கூறி வரவேற்றனர்.
