ஜனநாயகப் போராளியின் உபதலைவர் நகுலேஸ் பயங்கரவாதத் தடைச்சட்டத்திலிருந்து விடுவிப்பு
ஜனநாயகப் போராளிகள் கட்சியின் உபதலைவர் என்.நகுலேஸ் மீது தொடுக்கப்பட்டிருந்த பயங்கரவாதத் தடைச்சட்டத்தின் கீழான வழக்கில் இருந்து முற்றாக விடுவிக்கப்பட்டார்.
நேற்றைய தினம் (30) களுவாஞ்சிக்குடி நீதிமன்றத்தில் குறித்த வழக்கு எடுத்துக் கொள்ளப்பட்ட போதே நீதவானால் குறித்த உத்தரவு பிறப்பிக்கப்பட்டது.
கடந்த 2023 நவம்பர் 24ம் திகதி மாவீரர் தினத்தை முன்னிட்டு ஜனநாயகப் போராளிகள் கட்சியின் ஏற்பாட்டில், நகுலேஸ் தலைமையில் மாவீரர் குடும்ப உறவுகளை கௌரவிக்கும் நிகழ்வு நடாத்தப்பட்டது.
இந்த நிகழ்வு போது பயங்கரவாதத்தைத் தூண்டுவதாகாக் கூறி, அவர் பயங்கரவாதத் தடைச் சட்டத்தின் கீழ் வெல்லாவெளி பொலிஸாரால் கைது செய்யப்பட்டு, சுமார் இரண்டு மாதங்கள் மட்டக்களப்பு சிறைச்சாலையில் விளக்கமறியலில் வைக்கப்பட்டிருந்து, பின்னர் பிணையில் விடுவிக்கப்பட்டிருந்தார்.
அதனைத் தொடர்ந்து சட்டமா அதிபரின் ஆலோசனைக்காக குறித்த வழக்குக் கோவை அனுப்பி வைக்கப்பட்டிருந்த நிலையில் குறித்த வழக்கு அழைக்கப்பட்டது. அதனைத் தொடர்ந்து சட்டமா அதிபரின் ஆலோசனைக்கமைவாக குறித்த வழக்கில் இருந்து நகுலேஸ் முற்றாக விடுவிக்கப்பட்டதுடன், வழக்கும் முடிவுறுத்தப்பட்டது.
