நுவரெலியா மாவட்டம், மஸ்கெலியா பொலிஸ் பிரிவிற்குட்பட்ட சாமிமலை, கவரவில தோட்டத்தில் சத்தியாக்கிரக போராட்டத்தை முன்னெடுத்து வந்த எட்டு தொழிலாளர்கள் தமக்கு இதுவரை உரிய தீர்வு கிடைக்கவில்லையென கோரி ஏழாவது நாளான இன்று (10) உண்ணாவிரத போராட்டத்தை முன்னெடுத்துள்ளனர்.
பணி இடைநீக்கம் செய்துள்ள தோட்ட நிர்வாகத்தின் கெடுபிடிக்கு எதிராகவும் தமக்கு நீதி கோரியும் தோட்ட ஆலய முன்றலில் 08 தொழிலாளர்கள் போராட்டத்தை முன்னெடுத்து வருகின்றனர்.
கவரவில தேயிலைத் தோட்டத்தில் தினமும் வெளியிலிருந்து தொழிலாளர்களை கொண்டு வந்து தேயிலைக் கொழுந்து பறிக்க அனுமதிக்க வேண்டாம் என கவரவில தேயிலைத் தோட்டத் தொழிலாளர்கள் எதிர்ப்பு தெரிவித்ததால், தோட்ட நிர்வாகத்துடன் கருத்து மோதலொன்று எற்பட்டுள்ளது.
இதனையடுத்து தங்கள் சேவைகளை தன்னிச்சையாக தோட்ட நிர்வாகம் நிறுத்தி வைத்துள்ளதாகவும் பாதிக்கப்பட்ட தொழிலாளர்கள் தெரிவிக்கின்றனர்.
இவர்களது போராட்டம் குறித்து உரிய தீர்வு வழங்கப்பட வேண்டும் என வலியுறுத்தி பாராளுமன்ற உறுப்பினர்களான மனோ கணேசன், பழனி திகாம்பரம் ஆகியோர் தோட்ட நிர்வாகத்துடன் பேச்சுவார்த்தையொன்றையும் முன்னெடுத்திருந்த போதிலும் இதுவரை உரிய தீர்வு கிடைக்கவில்லையெனவும் தொழிலாளர்கள் சுட்டிகாட்டுகின்றனர்.
இதேவேளை இவர்களது போராட்டத்திற்கு கொட்டகலை தோட்டத் தொழிலாளர்களும் தமது ஆதரவினை வழங்கிவருகின்றமையும் குறிப்பிடத்தக்கது.
