டி20 உலகக் கிண்ண தொடரின் அரையிறுதிப் போட்டிகளை நடத்துவதற்கான நிபந்தனைகளை சர்வதேச கிரிக்கெட் கவுன்சில் (ICC) மறுசீரமைத்துள்ளது. சமீபத்தில் வெளியிடப்பட்ட இந்த புதிய ஏற்பாடுகள், அணிகள் அரையிறுதிக்கு தகுதி பெறும் நிலையைப் பொறுத்து போட்டிகள் நடைபெறும் இடத்தை மாற்றும் வகையில் வடிவமைக்கப்பட்டுள்ளன.
புதிய திட்டத்தின்படி, பாகிஸ்தான் அணி அரையிறுதிக்கு முன்னேறினால், அந்த போட்டியை இலங்கையில் நடத்த ICC திட்டமிட்டுள்ளது. அதேபோல், பாகிஸ்தான் இல்லாமல் இலங்கை அணி அரையிறுதிக்குத் தகுதி பெற்றால், எதிரணி இந்தியா அல்லாத பட்சத்தில் அரையிறுதி போட்டி இலங்கையில் நடைபெறும் என்றும் தெரிவிக்கப்பட்டுள்ளது. ஆனால் இலங்கையும் பாகிஸ்தானும் அரையிறுதிக்குத் தகுதி பெறவில்லை என்றால், இரண்டு அரையிறுதிப் போட்டிகளையும் இந்தியாவில் நடத்த ICC தீர்மானித்துள்ளது.
இந்த மாற்றங்கள் இந்தியா–பாகிஸ்தான் இடையிலான அரசியல் பதற்றம் மற்றும் பாதுகாப்பு கவலைகளை கருத்தில் கொண்டு மேற்கொள்ளப்பட்டுள்ளதாக ICC வட்டாரங்கள் சுட்டிக்காட்டுகின்றன. அணிகளின் பயண வசதி, ரசிகர்கள் வருகை, ஒளிபரப்பு ஏற்பாடுகள் உள்ளிட்ட பல அம்சங்களையும் கருத்தில் கொண்டு இந்த ஹைபிரிட் முறைமை அறிமுகப்படுத்தப்பட்டுள்ளதாக கூறப்படுகிறது.
இதனிடையே, அரையிறுதி போட்டிகளுக்கான இறுதி அட்டவணை அணிகள் தகுதி பெறும் நிலை தெளிவான பின்னரே அதிகாரப்பூர்வமாக அறிவிக்கப்படும் என எதிர்பார்க்கப்படுகிறது.
