நீதிமன்றில் முன்னிலையாகுமாறு வன்னி மாவட்ட நாடாளுமன்ற உறுப்பினர் எஸ்.வினோ நோகராதலிங்கத்திற்கு முல்லைத்தீவு காவல்துறையின் ஊடாக நீதிமன்ற அழைப்பாணை விடுக்கப்பட்டுள்ளது.
குறித்த அழைப்பாணையில் எதிர்வரும் 14 ஆம் திகதி வியாழக்கிழமை வினோ நோகராதலிங்கத்திற்கு முன்னிலையாகுமாறு குறிப்பிடப்பட்டுள்ளது.
முல்லைத்தீவு மாவட்டம் குருந்தூர் மலையில் நீதிமன்ற கட்டளையையும் மீறி பௌத்த விகாரை நிர்மாணிக்கப்பட்டிருந்த நிலையில் பூசை வழிபாடுகளுக்காக சென்ற பௌத்த குருமாரின் வழிபாட்டுக்கு இடையூறு விளைவித்தமை மற்றும் அவமானப்படுத்திய குற்றச்சாட்டுக்களை முன்வைத்து சில பிக்குகள் முல்லைத்தீவு காவல்நிலையத்தில் முறைப்பாடு செய்திருந்தனர்.
பிக்குமாரின் முறைப்பாட்டுக்கமைவாக முல்லைத்தீவு காவல்துறையினர் முல்லைத்தீவு நீதிமன்றில் வழக்குதாக்கல் செய்திருந்தனர்.
அந்த வழக்கில் நாடாளுமன்ற உறுப்பினரான செல்வராசா கஜேந்திரன் உட்பட பலரின் பெயர்கள் குறிப்பிடப்பட்டு வழக்கு தொடர்ச்சியாக நடைபெற்று வரும் நிலையில் முதன் முதலாக வினோ நோகராதலிங்கத்திற்கும் அழைப்பாணை விடுக்கப்பட்டுள்ளதாக தெரிவிக்கப்பட்டுள்ளது.
