டீசல் விலை அதிகரித்துள்ள போதிலும், தற்போதைய நிலையில் பாடசாலை மாணவர்களுக்கான போக்குவரத்துக் கட்டணங்களை உயர்த்துவதற்கு எந்தவித தீர்மானமும் எடுக்கப்படவில்லை என அகில இலங்கை பாடசாலை மாணவர் போக்குவரத்து சேவை தொழில்முனைவோர் சங்கத்தின் தலைவர் மல்ஷ்ரீ டி சில்வா தெரிவித்துள்ளார்.
எரிபொருள் விலை உயர்வால் பாடசாலை போக்குவரத்துச் சேவைகளைத் தொடர்ந்து முன்னெடுப்பதில் பல்வேறு சவால்கள் ஏற்பட்டுள்ளதாக அவர் குறிப்பிட்டுள்ளார்.
எனினும், எரிபொருள் விலை அதிகரிப்பைக் காரணமாகக் கொண்டு பெற்றோர்கள் மீது மேலதிக பொருளாதாரச் சுமையைச் சுமத்த விரும்பவில்லை என்றும் அவர் தெரிவித்துள்ளார்.
மேலும், டீசல் விலையைக் குறைப்பதற்கு அரசாங்கம் நடவடிக்கை எடுத்தால், அதன் மூலம் கிடைக்கும் நிதி நிவாரணத்தைப் பாடசாலை மாணவர்களின் பெற்றோருக்கும் வழங்க முடியும் என அவர் சுட்டிக்காட்டியுள்ளார்.
இது தொடர்பில் கருத்து வெளியிட்ட அவர்,
“டீசல் விலை அதிகரித்திருந்தாலும், பாடசாலை மாணவர்களின் போக்குவரத்துக் கட்டணங்களை அதிகரிப்பதற்கு நாம் எதிர்பார்க்கவில்லை. முடிந்தால் டீசல் விலையை ஏதேனும் தொகையினால் குறைத்துத் தாருங்கள். அவ்வாறு செய்தால் கிடைக்கும் நிவாரணத்தைப் பெற்றோருக்கும் வழங்க எம்மால் முடியும்” எனத் தெரிவித்துள்ளார்.
எரிபொருள் விலை உயர்வால் போக்குவரத்துத் துறையினர் பாதிக்கப்பட்டுள்ள போதிலும், மாணவர்களின் பெற்றோரின் நலனைக் கருத்திற்கொண்டு கட்டணங்களை அதிகரிக்காமல் தொடர்ந்தும் சேவைகளை முன்னெடுக்கத் தீர்மானித்துள்ளதாக அவர் மேலும் தெரிவித்துள்ளார்.
