விளக்கமறியலில் வைக்கப்பட்டுள்ள நாடாளுமன்ற உறுப்பினர் நாமல் ராஜபக்ஷவுக்கு அவரது குடும்பத்தினர் உணவு வழங்கி வருவதுடன், அவருடன் ஒரே வார்டில் தங்கியுள்ள ஏனைய கைதிகளுக்கும் அந்த உணவு பகிர்ந்தளிக்கப்படுவதாக சட்டத்தரணி சஞ்சீவ வீரவிக்ரம தெரிவித்துள்ளார்.
இது தொடர்பில் கருத்துத் தெரிவித்த அவர், நாமலின் மனைவி லிமினி மற்றும் குடும்பத்தினர் அவருக்குத் தொடர்ந்து உணவு கொண்டு வருவதாகவும், தாம் நாமலைச் சந்திக்கச் செல்லும் சந்தர்ப்பங்களில் இதனை நேரடியாகக் காண்பதாகவும் குறிப்பிட்டுள்ளார்.
நாமலுக்கு மாத்திரமன்றி, அவர் தங்கியுள்ள வார்டில் உள்ள ஏனைய கைதிகளுக்கும் அவரது குடும்பத்தினர் உணவு வழங்கி வருவதாகவும் அவர் தெரிவித்துள்ளார்.
மேலும், நாமலுக்குப் போதுமான அளவு உணவு கிடைப்பதாகவும், அதனை அங்குள்ள அனைவருடனும் பகிர்ந்துகொண்ட பின்னரே அவர் உணவருந்துவதாகவும் சட்டத்தரணி சுட்டிக்காட்டியுள்ளார்.
அத்துடன், சிறை அதிகாரிகள் மற்றும் ஏனைய கைதிகள் நாமலுடன் மிகுந்த அன்புடனும் நட்புடனும் பழகி வருவதாகவும் சஞ்சீவ வீரவிக்ரம மேலும் தெரிவித்துள்ளார்.
