அம்பாறை மாவட்டம், கல்முனை ஆதார வைத்தியசாலையில் (BHKN) 24 மணி நேரமும் தொடர்ச்சியாக CT ஸ்கேன் பரிசோதனைச் சேவை வழங்கப்பட்டு வருவதாக வைத்தியசாலை நிர்வாகம் தெரிவித்துள்ளது.
கிழக்கு மாகாணம் முழுவதிலும் உள்ள நோயாளர்களுக்கு விரைவாக நோய்களைக் கண்டறிந்து, உரிய சிகிச்சைத் தீர்மானங்களை மேற்கொள்வதற்கு இந்தச் சேவை பெரிதும் உதவி வருவதாகத் தெரிவிக்கப்படுகிறது.
இதன் மூலம் அம்பாறை மற்றும் மட்டக்களப்பு மாவட்டங்களைச் சேர்ந்த பல வைத்தியசாலைகளின் நோயாளர்கள் பயனடைந்து வருகின்றனர்.
அம்பாறை மாவட்டத்தில் அம்பாறை, நிந்தவூர், சம்மாந்துறை, அக்கரைப்பற்று, பொத்துவில் மற்றும் திருக்கோவில் ஆகிய வைத்தியசாலைகளிலிருந்து பரிந்துரைக்கப்படும் நோயாளர்கள் இந்தச் சேவையைப் பெற்றுக்கொள்கின்றனர்.
அதேபோன்று, மட்டக்களப்பு மாவட்டத்தில் களுவாஞ்சிக்குடி மற்றும் வாழைச்சேனை வைத்தியசாலைகளின் நோயாளர்களும் இந்த வசதியின் மூலம் பயன்பெற்று வருகின்றனர்.
இவ்வைத்தியசாலையில் மாதாந்தம் சுமார் 550 முதல் 600 வரையான நோயாளர்களுக்கு CT ஸ்கேன் பரிசோதனைகள் மேற்கொள்ளப்படுகின்றன. குறிப்பாக, 24 மணி நேரமும் சேவை கிடைப்பதால், அவசர சிகிச்சைப் பிரிவுக்கு வரும் நோயாளர்களை உடனடியாகப் பரிசோதித்து, விரைவான சிகிச்சைகளை வழங்குவதற்கான வாய்ப்பு ஏற்பட்டுள்ளது.
தரமான, பாதுகாப்பான மற்றும் அனைவருக்கும் இலகுவாகக் கிடைக்கக்கூடிய சுகாதார சேவைகளை வழங்குவதில் கல்முனை ஆதார வைத்தியசாலை தொடர்ந்து அர்ப்பணிப்புடன் செயற்பட்டு வருவதாக வைத்தியசாலைப் பணிப்பாளர் மருத்துவர் குணசிங்கம் சுகுணன் தெரிவித்துள்ளார்.
