அமெரிக்காவில் அலிசியா பெக்ஸன் என்பவர் அவரது கணவரின் மரணத்துக்கு ‘கூகுள் மெப்’ காரணம் என்று கூறி அந்நிறுவனத்துக்கு எதிராகவழக்குத் தொடுத்துள்ளார். அலிசியாவின் கணவர் பிலிப் பெக்ஸன் கடந்த ஆண்டு செப்டெம்பர் மாதம் சேதமுற்ற பாலத்தின் மீது பயணம் செய்து நீரில் விழுந்து உயிரிழந்துள்ளார்.
வடக்கு கரோலைனாவிலுள்ள அந்தப் பாலம் 9 ஆண்டுகளுக்கு முன்னரே உடைந்துவிட்டது. ஆனால் கூகுள் மெப்பில் அந்த விபரங்கள் புதுப்பிக்கப்படவில்லை. தமது கணவருக்கு அந்த இடம் புதிது என்பதால் அந்தப் பாலம் ஏற்கனவே உடைந்த தகவல் அவருக்குத் தெரியாது என்கிறார் அலிசியா.
எனவே கவனக் குறைவாகச் செயல்பட்டு தமது கணவரின் மரணத்துக்குக் காரணமாகஇருந்த கூகுள் மெப் மீது நீதிமன்றத்தில் அலிசியா தற்போது வழக்குத் தொடுத்துள்ளார். சேதமடைந்த பாலத்தை மீண்டும் நிர்மாணிக்கத் தவறிய 3 நிறுவனங்கள் மீதும் வழக்குத் தொடரப்பட்டுள்ளது. பெக்ஸன் குடும்பத்துக்கு அனுதாபம் தெரிவித்த கூகுள் நிறுவனத்தின் பேச்சாளர் வழக்கைப் பரிசீலிப்பதாக ஏ.பீ செய்தி நிறுவனத்திற்கு தெரிவித்தார்.
