ஸ்ரீலங்கா பொதுஜன பெரமுன (SLPP) கட்சியின் வளர்ச்சிக்கும் அதன் கட்டமைப்புக்கும் முன்னாள் அமைச்சர் பசில் ராஜபக்ச ஆற்றிய பங்களிப்பு அளப்பரியது என நாமல் ராஜபக்ச குறிப்பிட்டுள்ளார்.
பசில் ராஜபக்ச மிகச்சிறந்த அரசியல் வியூகவாதி மற்றும் நிர்வாகத் திறமை கொண்டவர் என்பதை வலியுறுத்திய அவர், அவரது நிர்வாக மற்றும் திட்டமிடல் திறமைகளுக்கு இணையாக இலங்கையில் தற்போதைக்கு வேறு யாரும் இல்லை என்றும் புகழாரம் சூட்டியுள்ளார்.
தற்போது ஸ்ரீலங்கா பொதுஜன பெரமுன கட்சி பசில் ராஜபக்சவின் முழுமையான ஆசீர்வாதத்துடனேயே தொடர்ந்து இயங்கி வருவதாக நாமல் ராஜபக்ச தெளிவுபடுத்தியுள்ளார்.
கட்சியின் தேசிய அமைப்பாளர் பதவியில் மாற்றம் ஏற்பட்டிருந்தாலும், கட்சியின் அடிமட்டக் கட்டமைப்பை வலுப்படுத்துவதிலும் கிராம மட்டத்திலிருந்து புதிய தலைவர்களை உருவாக்குவதிலும் அவரது ஆலோசனைகள் தொடர்ந்து வழிகாட்டியாக இருக்கும் என்று அவர் கூறினார்.
பசில் ராஜபக்சவின் எதிர்கால நேரடி அரசியல் பங்களிப்பு குறித்து ஊடகவியலாளர்கள் கேள்வி எழுப்பிய போது, “எங்கள் கட்சிக்கு அவரது ஆசீர்வாதம் எப்போதும் உண்டு” என்று நாமல் பதிலளித்தார்.
அதற்கு அப்பால், அவர் தீவிர அரசியலில் ஈடுபடுவதா இல்லையா என்பது முற்றிலும் அவருடைய தனிப்பட்ட விருப்பம் என்றும், அந்த முடிவை எடுக்க வேண்டியது அவரே தவிர தன்னால் அதைத் தீர்மானிக்க முடியாது என்றும் நாமல் ராஜபக்ச சுட்டிக்காட்டினார்.
முன்னாள் ஜனாதிபதிகளான மஹிந்த ராஜபக்ச, கோட்டாபய ராஜபக்ச மற்றும் முன்னாள் சபாநாயகர் சமல் ராஜபக்ச உள்ளிட்ட ராஜபக்ச குடும்பத்தின் சிரேஷ்ட உறுப்பினர்கள் அனைவரும் தற்போது ஒருமித்த கருத்தைக் கொண்டுள்ளதாக நாமல் ராஜபக்ச தெரிவித்தார்.
அதாவது, நாட்டின் அரசியலையும் கட்சித் தலைமையையும் அடுத்த தலைமுறையினரிடம் (இளம் தலைமுறையினரிடம்) ஒப்படைக்க வேண்டிய தருணம் இதுவென்பதை மூத்த தலைவர்கள் அனைவரும் மனப்பூர்வமாக ஏற்றுக்கொண்டுள்ளதாக அவர் தனது பேட்டியில் மேலும் விவரித்தார்.
