இலங்கையில் கொலோஸ்டமி பைகளுக்குத் தட்டுப்பாடு நிலவுவதாகத் தகவல்கள் வெளியாகியுள்ள நிலையில், நாடளாவிய ரீதியில் உள்ள மருத்துவமனைகளில் குறித்த பைகள் கிடைக்கவில்லை என காலி தேசிய வைத்தியசாலையின் பிரதிப் பணிப்பாளர் நாயகம் வைத்தியர் பிரியந்த அட்டப்பட்ட தெரிவித்துள்ளார்.
காலி (கராப்பிட்டிய) தேசிய வைத்தியசாலை கொலோஸ்டமி பைகளைப் பெற்றுக்கொள்வதற்காகப் பொதுமக்களிடம் நன்கொடை கோரியதாக சமூக ஊடகங்களில் தகவல்கள் பரவியிருந்தன. இதனால், நோயாளிகள் மாதாந்தம் சுமார் 20,000 ரூபாய் செலவிட வேண்டியுள்ளதாகவும் தெரிவிக்கப்பட்டது.
இது தொடர்பாக இலங்கை ஊடகம் ஒன்றிடம் நேற்று (25) கருத்துத் தெரிவித்த வைத்தியர் பிரியந்த அட்டப்பட்ட, நாட்டிலுள்ள மருத்துவமனைகளில் தற்போது கொலோஸ்டமி பைகள் கிடைக்கவில்லை எனக் குறிப்பிட்டுள்ளார்.
உள்நாட்டில் கொலோஸ்டமி பைகளை கொள்வனவு செய்வதற்காக இரண்டு நிறுவனங்கள் விலைமனுக்களைச் சமர்ப்பித்திருந்ததாகவும், ஒரு நிறுவனம் ஒரு பைக்கு சுமார் 9,000 ரூபாயையும் மற்றைய நிறுவனம் சுமார் 3,000 ரூபாயையும் விலையாகக் குறிப்பிட்டிருந்ததாகவும் அவர் தெரிவித்துள்ளார்.
குறைந்த விலையில் முன்வைக்கப்பட்ட பைகள் இலங்கையில் இதற்கு முன்னர் பயன்படுத்தப்படாததால், அவற்றின் தரத்தை உறுதிப்படுத்துவதற்காக முதற்கட்டமாக 50 பைகளைப் பெற்றுப் பரிசோதிக்க தொழில்நுட்ப மதிப்பீட்டுக் குழு தீர்மானித்ததாகவும் அவர் கூறியுள்ளார்.
இதற்கமைய, உள்நாட்டுக் கொள்வனவு மூலம் 50 கொலோஸ்டமி பைகள் பெறப்பட்டு தற்போது பயன்படுத்தப்படுவதாகவும், அவற்றில் இதுவரை எந்தப் பிரச்சினையும் ஏற்படவில்லை என்றும் அவர் தெரிவித்துள்ளார்.
இதேவேளை, இந்த ஆண்டு ஆரம்பத்தில் கொள்வனவு செய்யப்பட்ட முதலாவது தொகுதி கொலோஸ்டமி பைகள் தரப் பரிசோதனையில் தோல்வியடைந்ததால், அவை பயன்பாட்டிலிருந்து நீக்கப்பட்டதாகவும், அதன் பின்னர் மேலதிக கொள்வனவுகள் எதுவும் மேற்கொள்ளப்படவில்லை என்றும் அவர் குறிப்பிட்டுள்ளார்.
இதற்கிடையில், கொலோஸ்டமி பைகளைக் கொள்வனவு செய்வதற்கான கேள்விப்பத்திர நடவடிக்கைகள் மருத்துவப் பொருட்கள் விநியோகப் பிரிவில் (MSD) தற்போது முன்னெடுக்கப்பட்டு வருவதாகத் தகவலறிந்த வட்டாரங்கள் தெரிவித்துள்ளன.
இது தொடர்பாக மருத்துவப் பொருட்கள் விநியோகப் பிரிவின் பிரதிப் பணிப்பாளர் நாயகத்திடம் கருத்தைப் பெற மேற்கொள்ளப்பட்ட முயற்சிகள் வெற்றியளிக்கவில்லை.
