வடக்கு, கிழக்கில் வனப் பகுதிகளாக அறிவிக்கப்பட்ட காணிகள் விடுவிப்பு?; வடக்கில் புதிய வனப் பகுதிகளை அறிவிப்பதற்கும் தற்காலிகத் தடை!

வடக்கு மற்றும் கிழக்கு மாகாணங்களில் வனப் பகுதிகளின் எல்லைகள் தொடர்பாக நிலவும் சர்ச்சைகளுக்குத் தீர்வுகாணும் இரு கட்டத் திட்டத்தின் முதற்கட்டத்தின் கீழ், வனப் பாதுகாப்புப் பகுதிகளிலிருந்து விடுவிக்கப்பட வேண்டிய காணிகள் அடையாளம் காணப்பட்டுள்ளதாக சுற்றாடல் அமைச்சர் வைத்தியர் தம்மிக்க பட்டபெந்தி தெரிவித்துள்ளார்.

இது தொடர்பாக கருத்துத் தெரிவித்த அவர், காணி உரிமை மற்றும் எல்லைகள் தொடர்பான பிரச்சினைகள் முழுமையாகத் தீர்க்கப்படும் வரை, வடக்கு மாகாணத்தில் புதிதாக அடையாளம் காணப்பட்ட வனப் பகுதிகளை உத்தியோகபூர்வமாக அறிவிப்பதைத் தற்காலிகமாக நிறுத்தியுள்ளதாகக் குறிப்பிட்டுள்ளார்.

முந்தைய அரசாங்கங்களின் காலத்தில், குறிப்பாக வனப் பாதுகாப்புத் திணைக்களத்தினால் GPS தொழில்நுட்பத்தைப் பயன்படுத்தி வனப் பகுதிகளின் எல்லைகள் நிர்ணயிக்கப்பட்டபோது, தனியார் காணிகள் மட்டுமன்றி அரச நிறுவனங்கள் மற்றும் வைத்தியசாலைகளும் வனப் பாதுகாப்பு எல்லைகளுக்குள் உள்ளடக்கப்பட்டதாக அமைச்சர் தெரிவித்துள்ளார்.

இதனால் ஏற்பட்ட பிரச்சினைகளை ஆராய்ந்து, பாதிக்கப்பட்ட அரச காணிகளை அடையாளம் காண்பதற்கும் அவற்றை வனப் பாதுகாப்புப் பகுதிகளிலிருந்து விடுவிப்பதற்கான வழிமுறைகளைத் தயாரிப்பதற்கும் குழுவொன்று நியமிக்கப்பட்டதாக அவர் கூறியுள்ளார்.

கடந்த ஆண்டு ஆகஸ்ட் மாதமளவில் நியமிக்கப்பட்ட இந்தக் குழுவுக்கு ஆறு மாத கால அவகாசம் வழங்கப்பட்டிருந்தபோதிலும், சில மாவட்ட ஒருங்கிணைப்புக் குழுக்களின் போதிய ஒத்துழைப்பு கிடைக்காததால், ஓராண்டுக்கும் மேலாகியும் இறுதி அறிக்கை சமர்ப்பிக்கப்படவில்லை எனவும் அவர் தெரிவித்துள்ளார்.

எனினும், காணிகளை விடுவிக்கும் நடவடிக்கைகள் முன்னெடுக்கப்பட்டு வருவதாகக் குறிப்பிட்ட அமைச்சர், முதற்கட்டத்தில் விடுவிக்கப்பட வேண்டிய காணிகள் அடையாளம் காணப்பட்டுள்ளதாகவும், எஞ்சிய பிரச்சினைகள் இரண்டாம் கட்டத்தில் தீர்க்கப்படும் என்றும் தெரிவித்துள்ளார்.

வடக்கில் புதிய வனப் பகுதிகளை அறிவிப்பதில் தாமதம்

காணிகளின் எல்லைகள் மற்றும் உரிமை தொடர்பான சர்ச்சைகள் தீர்க்கப்படும் வரை வடக்கு மாகாணத்தில் புதிதாக அடையாளம் காணப்பட்ட வனப் பகுதிகளை உத்தியோகபூர்வமாக அறிவிக்கப் போவதில்லை என அமைச்சர் தெரிவித்துள்ளார்.

உள்நாட்டுப் போர் முடிவடைந்து பல தசாப்தங்கள் கடந்துள்ள நிலையிலும், வடக்கு மற்றும் கிழக்கில் அரசாங்கத்தினால் வன மற்றும் வனவிலங்கு பாதுகாப்புப் பகுதிகளாக அறிவிக்கப்பட்ட காணிகள் தொடர்பான பிரச்சினைகள் தொடர்ந்தும் முக்கியமான சமூக மற்றும் அரசியல் சவாலாக உள்ளன.

கொள்கை மாற்று நிலையம் (CPA) வெளியிட்டுள்ள ஆய்வுகள் மற்றும் கண்காணிப்பு அறிக்கைகளின்படி, அரசாங்கத்தினால் பாதுகாப்புப் பகுதிகளாக எல்லை நிர்ணயம் செய்யப்பட்ட காணிகள், பாரம்பரியமாகப் பயன்படுத்தப்பட்ட மூதாதையர் நிலங்கள், விவசாயக் காணிகள் மற்றும் போரினால் இடம்பெயர்ந்த மக்களின் குடியிருப்புகளுடன் சில சந்தர்ப்பங்களில் ஒன்றுடன் ஒன்று மோதுகின்றன.

சுற்றாடல் பாதுகாப்பு என்ற பெயரில் மேற்கொள்ளப்படும் ஒருதலைப்பட்சமான காணி அபகரிப்புகள் இனங்களுக்கு இடையிலான பதற்றங்களை அதிகரிப்பதுடன், போருக்குப் பிந்தைய நல்லிணக்க முயற்சிகளையும் பாதிப்பதாக மனித உரிமை அமைப்புகளும் சிவில் சமூக அமைப்புகளும் எச்சரித்துள்ளன.

மேலும், வனப் பாதுகாப்புத் திணைக்களம், வனவிலங்கு பாதுகாப்புத் திணைக்களம் மற்றும் மகாவலி அதிகாரசபை போன்ற மத்திய அரச நிறுவனங்களின் அதிகார வரம்புகளுடன் காணி நிர்வாகம் தொடர்பான பிரச்சினைகள் ஒன்றுடன் ஒன்று இணைவதால், நீர்ப்பாசனக் குளங்களைப் புனரமைத்தல், நீர்வழிகளைச் சீரமைத்தல் மற்றும் கிராமப்புற வீதிகளை அமைத்தல் உள்ளிட்ட அபிவிருத்திப் பணிகளும் தாமதமடைவதாகப் பிராந்திய அதிகாரிகள் சுட்டிக்காட்டியுள்ளனர்.

இந்நிலையில், வடக்கு மற்றும் கிழக்கில் இடம்பெயர்ந்த மக்களின் மீள்குடியேற்றம், கால்நடை மேய்ச்சல் நிலங்களைப் பெற்றுக்கொடுத்தல் மற்றும் பிராந்திய அபிவிருத்தியை இலகுபடுத்துதல் உள்ளிட்ட தேவைகளுக்காக, அரச கட்டுப்பாட்டிலுள்ள சுமார் 200,000 ஏக்கர் காணிகளை விடுவிப்பது தொடர்பான முன்மொழிவுகளும் ஆராயப்பட்டு வருகின்றன.

26 ஆண்டுகளுக்குப் பின்னர் சுற்றாடல் சட்டத்தில் திருத்தம்

இதற்கிடையில், நாட்டின் சுற்றாடல் சட்டங்களை நவீனமயப்படுத்துவதற்கான சட்டத் திருத்த நடவடிக்கைகளும் முன்னெடுக்கப்பட்டு வருவதாக அமைச்சர் தெரிவித்துள்ளார்.

தேசிய சுற்றாடல் சட்டம் 26 ஆண்டுகளுக்குப் பின்னர் திருத்தப்பட்டு நிறைவேற்றப்பட்டுள்ளதாகக் குறிப்பிட்ட அவர், மேலும் மூன்று சட்டங்களில் திருத்தங்களை மேற்கொள்வதற்கான நடவடிக்கைகள் முன்னெடுக்கப்பட்டு வருவதாகத் தெரிவித்துள்ளார்.

1937ஆம் ஆண்டின் 2ஆம் இலக்க விலங்கினங்கள் மற்றும் தாவரங்கள் பாதுகாப்புக் கட்டளைச் சட்டத்தில் (FFPO) 44 ஆண்டுகளாகத் திருத்தங்கள் மேற்கொள்ளப்படவில்லை என அமைச்சர் குறிப்பிட்டுள்ளார்.

இந்தச் சட்டத் திருத்தங்களுக்கான வரைபுச் சட்டமூலங்கள் தயாரிக்கப்பட்டுள்ளதாகவும், அவற்றுக்கு அமைச்சரவை அங்கீகாரத்தைப் பெறுவதற்குத் தயாராக இருப்பதாகவும் அவர் தெரிவித்துள்ளார்.

1964ஆம் ஆண்டின் 29ஆம் இலக்க நீர்வளச் சபைச் சட்டத்தைத் திருத்துவதற்கு அமைச்சரவை அங்கீகாரம் பெறப்பட்டுள்ளதாகவும், கடல் மாசுபாட்டைத் தடுக்கும் சட்டத்திற்கான திருத்த வரைபுகள் தற்போது தயாரிக்கப்பட்டு வருவதாகவும் அவர் மேலும் குறிப்பிட்டுள்ளார்.

பாரம்பரிய நிகழ்வுகளில் யானைகளைப் பயன்படுத்த புதிய கொள்கை

இதேவேளை, சிறைப்பிடிக்கப்பட்ட யானைகளைப் பராமரித்தல் மற்றும் பயன்படுத்துதல் தொடர்பான கொள்கை வரைபும் தயாரிக்கப்பட்டுள்ளதாக அமைச்சர் தெரிவித்துள்ளார்.

நீண்டகாலமாக இவ்விடயம் தொடர்பான கொள்கையொன்று நடைமுறையில் இல்லாததால், அதனுடன் தொடர்புடைய நடவடிக்கைகள் முடங்கியிருந்ததாக அவர் கூறியுள்ளார்.

இதற்காக நியமிக்கப்பட்ட குழுவினால் இறுதி வரைபு தயாரிக்கப்பட்டுள்ளதாகவும், அதனை மகாநாயக்க தேரர்கள் மற்றும் ஏனைய மதத் தலைவர்களுடன் கலந்துரையாடிய பின்னர் முன்னெடுக்கத் திட்டமிட்டுள்ளதாகவும் அவர் தெரிவித்துள்ளார்.

இதன் மூலம், விலங்கு நலன் தொடர்பான தரநிலைகளைப் பேணியவாறு, பாரம்பரிய மற்றும் மத விழாக்களில் பயன்படுத்தப்படும் யானைகளைப் பதிவு செய்தல் மற்றும் அவற்றைப் பயன்படுத்துதல் தொடர்பாக சட்டரீதியான கட்டமைப்பொன்றை உருவாக்குவதே நோக்கம் என அமைச்சர் மேலும் தெரிவித்துள்ளார்.