உலகின் முன்னணி கிரிப்டோகரன்சி வர்த்தகத் தளமான பைனான்ஸ் (Binance) நிறுவனத்தில் 6.3 பில்லியன் அமெரிக்க டொலர்களுக்கும் அதிக பெறுமதியான டிஜிட்டல் சொத்துக்கள் கொள்ளையிடப்பட்டுள்ளதாகத் தகவல்கள் வெளியாகியுள்ளன.
நேற்று (30) இடம்பெற்றதாகக் கூறப்படும் இந்தச் சம்பவம், உலக கிரிப்டோகரன்சி சந்தையில் பெரும் அதிர்வலைகளை ஏற்படுத்தியுள்ளது.
பைனான்ஸ் நிறுவனத்தின் மென்பொருள் பொறியியலாளர் ஒருவரின் மடிக்கணினியை ஹேக்கர்கள் கைப்பற்றியதன் ஊடாக இந்தத் தாக்குதல் ஆரம்பமானதாக ஆரம்பகட்டத் தகவல்கள் தெரிவிக்கின்றன. இதனைத் தொடர்ந்து, நிறுவனத்தின் வலையமைப்பிலிருந்த பாதுகாப்புக் குறைபாடுகளைப் பயன்படுத்தி ஹேக்கர்கள் ஊடுருவியுள்ளதாகக் கூறப்படுகிறது.
சம்பவத்தைத் தொடர்ந்து உடனடியாக நடவடிக்கையில் இறங்கிய பைனான்ஸ் நிறுவனம், டெதர் உள்ளிட்ட ஏனைய கிரிப்டோகரன்சி நிறுவனங்களுடன் இணைந்து 3 பில்லியன் டொலர்களுக்கும் அதிகமான டிஜிட்டல் சொத்துக்களின் பரிமாற்றங்களை முடக்கியதாகத் தெரிவிக்கப்படுகிறது.
மேலும், பாதுகாப்பு நடவடிக்கையாகத் தனது தளத்திலிருந்து கிரிப்டோகரன்சிகளை மீளப் பெறும் சேவையையும் தற்காலிகமாக இடைநிறுத்தியுள்ளது.
இதற்கிடையில், வாடிக்கையாளர்களின் வைப்புகள் பாதுகாப்பாக இருப்பதாகவும், ஏற்பட்ட இழப்புகள் அனைத்தையும் நிறுவனமே ஈடுசெய்யும் என்றும் பைனான்ஸ் அறிவித்துள்ளதாகத் தெரிவிக்கப்பட்டுள்ளது. இதற்காக 6.3 பில்லியன் டொலர்கள் ஒதுக்கப்பட்டுள்ளதாக நிறுவனத்தின் தலைமை நிர்வாக அதிகாரி ரிச்சர்ட் டெங் குறிப்பிட்டுள்ளார்.
இந்தத் தாக்குதலின் பின்னணியில் வடகொரியாவுடன் தொடர்புடைய ‘டிரேடர் ட்ரொய்டர்’ (TraderTraitor) எனப்படும் ஹேக்கர் குழு செயற்பட்டிருக்கலாம் என்ற சந்தேகமும் எழுந்துள்ளது.
கடந்த பல ஆண்டுகளாக சர்வதேச கிரிப்டோகரன்சி தளங்களை இலக்காகக் கொண்டு இணையவழித் திருட்டுகளில் ஈடுபடுவதாக வடகொரியா மீது குற்றச்சாட்டுகள் முன்வைக்கப்பட்டு வருகின்றன. இவ்வாறான சம்பவங்கள் தொடர்பில் அமெரிக்காவின் FBI உள்ளிட்ட பாதுகாப்பு அமைப்புகளும் வடகொரியாவைச் சுட்டிக்காட்டியுள்ளன. எனினும், இந்தக் குற்றச்சாட்டுகளை வடகொரியா மறுத்துள்ளது.
உலகம் முழுவதும் சுமார் 335 மில்லியன் பதிவு செய்யப்பட்ட பயனர்களைக் கொண்டுள்ள பைனான்ஸ் நிறுவனம், 2025 ஆம் ஆண்டின் ஆண்டு அறிக்கையின்படி 162.8 பில்லியன் டொலர் பெறுமதியான டிஜிட்டல் சொத்துக்களை நிர்வகித்து வருகிறது.
இந்தச் சம்பவத்தின் தாக்கம் உலகளாவிய கிரிப்டோகரன்சி சந்தையிலும் எதிரொலித்துள்ளதாகக் கூறப்படுகிறது. இதன்போது பைனான்ஸ் கிரிப்டோகரன்சியின் பெறுமதி 5 சதவீதமும், பிட்காயினின் பெறுமதி 3 சதவீதமும் வீழ்ச்சியடைந்ததாகத் தகவல்கள் தெரிவிக்கின்றன.
இதனிடையே, திருடப்பட்ட டிஜிட்டல் சொத்துக்களை மீட்டெடுப்பதற்காகச் சட்ட அமுலாக்க அதிகாரிகளுடன் இணைந்து நடவடிக்கைகளை முன்னெடுத்து வருவதாக பைனான்ஸ் நிறுவனத்தின் இணை நிறுவனரும் முன்னாள் தலைமை நிர்வாக அதிகாரியுமான சாங்பெங் சாவோ (Changpeng Zhao) தனது எக்ஸ் (X) சமூக வலைத்தளப் பதிவில் தெரிவித்துள்ளார்.
