மண்முனை வடக்கு பிரதேச செயலகமும் சமுர்த்தி திணைக்களமும் இணைந்து உலக சிறுவர் மற்றும் முதியோர் தினத்தை சிறப்பிக்கும் நோக்கில் ஏற்பாடு செய்த சர்வதேச முதியோர் தினவிழா மண்முனை வடக்கு பிரதேச செயலக டேபா மண்டபத்தில் நேற்று (06) இடம்பெற்றது.
பிரதேச செயலாளர் வி.வாசுதேவன் தலைமையில் நடைபெற்ற நிகழ்வில், பிரதம அதிதியாக உதவி மாவட்ட செயலாளர் ஆ. நவேஸ்வரன் கலந்து கொண்டார்.
”எல்லாவற்றையும் விட பிள்ளைகள் பெறுமதியானவர்கள் மற்றும் உலகளாவிய சிரேஸ்ட பிரஜைகளுக்கான மனித உரிமைகளை தலைமுறைகள் கடந்து நிறைவேற்றுதல்” எனும் தொனிப்பொருளில் இவ் நிகழ்வு இடம் பெற்றது.
இந்நிகழ்வில் கலந்து கொண்டு கருத்து தெரிவித்த பிரதேச செயலாளர் எமது நாட்டின் எதிர்கால தலைவர்களாகிய சிறார்களுக்கான கல்வியை நாம் அனைவரும் பெற்றுக் கொண்டுக்க வேண்டியது எமது கடமையாகும் என்பதுடன் இந்த சமூகத்திற்கு சிறந்த சேவையாற்றிய சிரேஸ்ட பிரஜைகளை கனம் செய்ய வேண்டும் என தெரிவித்தார்.
ஸ்ரீமத் சுவாமி நீல மாதவானந்தஜி கருத்து தெரிவிக்கையில் சிறார்களுக்கு சிறந்த நற்பழக்கவழக்கங்களை கற்றுக் கொடுக்க வேண்டும், அவர்களுக்கு பெற்றோர்கள் முன்மாதிரியாக செயற்பட வேண்டும் என கருத்து பகிர்ந்தார்.
இதன் போது சிறார்களினால் கண்கவர் கலை நிகழ்ச்சிகள் பல அரங்கேற்றப்பட்டது. மேலும் தெரிவு செய்யபட்ட பாடசாலை மாணவர்களுக்கு கற்றல் உபகரணங்களும் வழங்கப்பட்டதுடன், விசேட ஆற்றல்களை வெளிப்படுத்திய சிரேஷ்ட பிரஜைகளுக்கு கௌரவிக்கப்பட்டதுடன் சிறார்களுக்கு பரிசில்கள் வழங்கி மகிழ்விக்கப்பட்டது குறிப்பிடத்தக்கதாகும்.
இந்நிகழ்வில் ஆன்மிக அதிதியாக ஸ்ரீமத் சுவாமி நீல மாதவானந்தஜி மகராஜ், மட்டக்களப்பு மாவட்ட சமுர்த்தி பணிப்பாளர் எஸ். புவனேந்திரன், மண்முனை வடக்கு உதவிப் பிரதேச செயலாளர்களான சியாஹூல் ஹக், திருமதி. தட்சணியா பிரசாந்தன், சிறுவர் பெண்கள் பிரிவின் பொறுப்பதிகாரி சந்துணி எதிரிசிங்க, திட்டமிடல் பணிப்பாளர் திருமதி.பிறனவசோதி, சமுர்த்தி முகாமைத்துவப் பணிப்பாளர் வி.பிறைசூடி, சமுர்த்தி தலைமையக முகாமையாளர் கே.பரமலிங்கம் உள்ளிட்ட மண்முனை வடக்கு பிரதேச செயலக உத்தியோகத்தர்கள், பிரதேச மக்கள் எனப் பலர் கலந்து கொண்டனர்.
