சர்வதேச விண்வெளி நிலையத்தில் தங்கியிருந்து ஆய்வுப் பணிகளில் ஈடுபட்டு வரும் நாசா விஞ்ஞானி அணில் மேனன் மற்றும் கனடா விண்வெளி ஆய்வு நிறுவனத்தைச் சேர்ந்த ஜோஷுவா ஆகியோர் இன்று விண்வெளி நடை (Spacewalk) நடவடிக்கையில் ஈடுபட்டுள்ளனர்.
பூமியில் இருந்து சுமார் 400 கிலோமீற்றர் உயரத்தில் சுற்றுவட்டப் பாதையில் அமைந்துள்ள சர்வதேச விண்வெளி நிலையம், விண்வெளி ஆய்வுகளுக்கான முக்கிய ஆய்வகமாகச் செயற்பட்டு வருகிறது.
மணிக்கு சுமார் 28,000 கிலோமீற்றர் வேகத்தில் பயணிக்கும் இந்த விண்வெளி நிலையம், 90 நிமிடங்களுக்கு ஒருமுறை பூமியைச் சுற்றி வருகிறது.
இங்கு பல்வேறு நாடுகளைச் சேர்ந்த விண்வெளி வீரர்கள் தங்கியிருந்து பல்வேறு அறிவியல் ஆய்வுகளை மேற்கொண்டு வருகின்றனர்.
விண்வெளி நிலையத்தின் வெளிப்புறப் பகுதிகளில் ஏற்படும் தொழில்நுட்பக் கோளாறுகளைச் சரிசெய்வதற்கும், பழுதடைந்த உபகரணங்களை மாற்றுவதற்கும் விண்வெளி வீரர்கள் நிலையத்திற்கு வெளியே சென்று பணியாற்றுவது வழக்கமாகும். இவ்வாறான நடவடிக்கையே விண்வெளி நடை என அழைக்கப்படுகிறது.
அந்த வகையில், இன்று இந்திய நேரப்படி மாலை 4 மணியளவில் விண்வெளி நடையை ஆரம்பித்த அணில் மேனன் மற்றும் ஜோஷுவா ஆகியோர், விண்வெளி நிலையத்தின் வெளிப்புறத்தில் பொருத்தப்பட்டிருந்த பழைய சூரிய மின்தகடுகளை அகற்றி, புதிய மின்தகடுகளைப் பொருத்தும் பணியில் ஈடுபட்டுள்ளனர்.
புதிதாகப் பொருத்தப்பட்டுள்ள இந்த மின்சக்தி உபகரணங்கள், அறிவியல் ஆய்வுகள், உயிர் பாதுகாப்பு அமைப்புகள் உள்ளிட்ட விண்வெளி நிலையத்தின் அத்தியாவசியச் செயற்பாடுகளுக்குத் தேவையான மின்சாரத்தை உற்பத்தி செய்ய உதவும் எனத் தெரிவிக்கப்பட்டுள்ளது.
இதேவேளை, இந்த விண்வெளி நடை மற்றும் அதனுடன் தொடர்புடைய பணிகள் குறித்த காணொளிக் காட்சிகளையும் நாசா வெளியிட்டுள்ளது.
