பொலிஸ் வேலை என்பது சில்லறைக் கடை போன்றது. நிறைய பிரச்னைகளுக்கு முகம் கொடுக்கவேண்டி வரும். ஆகவே மணல் கடத்தல் விடயத்தை மாத்திரம் கண்காணித்துக் கொண்டிருக்க முடியாது. சாதாரண மக்கள் என்ன பிரச்னை என்றாலும் முதன்முதலாக நாடுவது பொலீஸ் நிலையத்தைத்தான். மக்களுக்கு நிறைய பிரச்னை உள்ளது. நாங்கள் உயிரைப் பணயம் வைத்துத்தான் பொலிஸ் கடமையைச் செய்கின்றோம் என யாழ்ப்பாண உதவி பொலிஸ் அத்தியட்சகர் யரூல் தெரிவித்தார்.
யாழ்.மாவட்ட ஒருங்கிணைப்புக் குழு கூட்டத்தில் சட்டவிரோத செயற்பாடுகளை கட்டுப்படுத்தல் தொடர்பில் ஆராயும் போது யாழ்.மாவட்ட பாராளுமன்ற உறுப்பினர் சிறீதரனால் முன்வைக்கப்பட்ட குற்றச்சாட்டுக்கு பதிலளித்தபோதே அவர் இவ்வாறு கூறினார்.அவர் மேலும் தெரிவிக்கையில் பொலிஸார் பல்வேறுபட்ட பிரச்னைகளுக்கு முகம் கொடுக்க வேண்டி வரும். அதாவது ஒரு திருடனை கைது செய்ய முயன்றால் அவன் ஒழித்திருப்பான் அல்லது வேறு எங்கேயாவது மறைத்திருப்பான். இப்படி பல சம்பவங்கள் உள்ளன. ஆனால் உயிரை துச்சம் என மதித்துத்தான் இந்த பொலிஸ் கடமையை செயற்படுத்துகிறோம்.
பாராளுமன்ற உறுப்பினர் தெரிவித்த கருத்து ஏற்கக்கூடிய கருத்து அல்ல. ஆளணிப் பற்றாக்குறை போன்ற பல்வேறு இடர்பாடுகளுக்கு மத்தியில் கடமையாற்றி வருகின்றோம். எனினும் யாழ். மாவட்டத்தில் பெருமளவு குற்றங்களை கட்டுப்படுத்தக்கூடியதாக உள்ளது.
நீங்கள் வேண்டுமென்றால் அறிக்கைகளை எடுத்துப் பாருங்கள். 75 வீதமான குற்றங்களைக் கட்டுப்படுத்தி வைத்திருக்கின்றோம். ஆகவே பொலிஸார் மீது இவ்வாறான குற்றச்சாட்டுகளை சுமத்துவதை நீங்கள் நிறுத்த வேண்டும்-என்றார்.
