வவுனியா புதிய பேருந்து நிலையத்தில் இளைஞர் ஒருவர் பொலிஸாரால் வலுக்கட்டாயமாகக் கைது செய்யப்பட்ட சம்பவம் தொடர்பில், வவுனியா நீதவான் நீதிமன்றம் முக்கிய உத்தரவு ஒன்றைப் பிறப்பித்துள்ளது.
குறித்த இளைஞர் போதைப்பொருள் எதனையும் பயன்படுத்தவில்லை என மருத்துவ அறிக்கையில் உறுதிப்படுத்தப்பட்டுள்ளதுடன், அவரது உடலில் காயங்கள் காணப்படுவதாகவும் தெரிவிக்கப்பட்டுள்ளது.
கடந்த 02ஆம் திகதி இடம்பெற்ற இந்தச் சம்பவத்தில், பொலிஸாரின் கடமைக்கு இடையூறு விளைவித்தமை மற்றும் மதுபோதையில் மோட்டார் சைக்கிளைச் செலுத்தியமை ஆகிய குற்றச்சாட்டுகளின் அடிப்படையில் இளைஞர் கைது செய்யப்பட்டதாகப் பொலிஸார் தெரிவித்திருந்தனர்.
எனினும், பொலிஸார் தன்னைத் தாக்கியதாகக் குறித்த இளைஞர் குற்றஞ்சாட்டியிருந்தார். இதுதொடர்பான காணொளி சமூக ஊடகங்களில் வெளியாகி பெரும் பரபரப்பை ஏற்படுத்தியிருந்தது.
இந்நிலையில், கைது செய்யப்பட்ட இளைஞர் நீதிமன்றத்தில் ஆஜர்படுத்தப்பட்டபோது, வவுனியா பொது வைத்தியசாலையில் பெறப்பட்ட மருத்துவ அறிக்கை நீதிமன்றத்தில் சமர்ப்பிக்கப்பட்டது.
குறித்த மருத்துவ அறிக்கையில், இளைஞர் போதைப்பொருள் பயன்படுத்தியதற்கான அறிகுறிகள் இல்லை எனத் தெரிவிக்கப்பட்டதுடன், அவரது உடலில் அடிகாயங்கள் காணப்படுவதாகவும் சுட்டிக்காட்டப்பட்டிருந்தது.
மருத்துவ அறிக்கையையும் சம்பவத்தின் பின்னணியையும் ஆராய்ந்த நீதவான், குறித்த இளைஞரைப் பிணையில் விடுவிக்க உத்தரவிட்டார்.
அத்துடன், சம்பவத்துடன் தொடர்புடைய பொலிஸாரின் செயற்பாடுகள் குறித்து விரிவான விசாரணைகளை முன்னெடுத்து, அதன் அறிக்கையை நீதிமன்றத்தில் சமர்ப்பிக்குமாறு வவுனியா தலைமைப் பொலிஸ் நிலையப் பொறுப்பதிகாரிக்கு உத்தரவிட்டுள்ளார்.
இந்த வழக்கில் இளைஞர் சார்பில் சிரேஷ்ட சட்டத்தரணி தி.திருவருள் தலைமையில் சட்டத்தரணிகளான திபின்சன் மற்றும் ஜெனைனி ஆகியோர் நீதிமன்றத்தில் முன்னிலையாகியிருந்தனர்.
