இலங்கையில் பொலிஸ் நிலையங்களில் தடுத்துவைக்கப்பட்டிருப்பவர்கள் மரணிக்கும் சம்பவங்கள் அதிகரிக்கின்ற நிலையில் அவற்றை தடுத்து நிறுத்துவதற்காக, தலையிடக்கோரி சிறைக்கைதிகளின் உரிமைகளை பாதுகாப்பதற்கான அமைப்பு ஐ.நா.விடமும், ஐரோப்பிய ஒன்றியத்திடமும் மனுக்களை கையளிக்கவுள்ளது.
சி.சி.பி.ஆர். அமைப்பின் தலைவர் சட்டத்தரணி சானகபெரேரா இதனை தெரிவித்துள்ளார்.
சமீபகாலங்களில் பொலிஸாரினால் தடுத்துவைக்கப்பட்டிருந்தவர்கள் மரணமடையும் சம்பவங்கள் அதிகரித்துள்ளதாக தெரிவித்துள்ள சானகபெரேரா சில நீதிமன்றங்கள் இவ்வாறான சில மரணங்களை குற்றங்கள் என குறிப்பிட்டுள்ளன எனவும் அவர் தெரிவித்துள்ளார்.
உயிரிழந்தவர்கள் மற்றும் அவர்களின் குடும்பத்தவர்களிற்கு நீதி வழங்குவதற்கும், இவ்வாறான சம்பவங்களை தடுப்பதற்காகவும், அவை மீண்டும் மீண்டும் நிகழ்வதை தடுப்பதற்கான நடவடிக்கைகளை சம்பந்தப்பட்ட அதிகாரிகள் எடுக்கவில்லை எனவும் அவர் சுட்டிக்காட்டியுள்ளார்.
