இலங்கை கடற்படை அதிகாரிகளை தாக்கிய இந்திய மீனவர்களுக்கு விளக்கமறியல் நீடிப்பு!

ஒத்திவைக்கப்பட்ட சிறைத்தண்டனையுடன் விடுதலை செய்யப்பட்ட 13 தமிழக மீனவர்களும் கடற்படையினரை தாக்கிய வழக்கில் விளக்கமறியலில் வைக்கப்பட்டுள்ளனர்.

இலங்கை கடற்பரப்பிற்குள் எல்லை தாண்டி மீன்பிடித்த குற்றச்சாட்டில் பருத்தித்துறை கடற்பரப்பில் வைத்து கடந்த 09 ஆம் திகதி 2 படகுகளுடன் காரைக்கால் பகுதியைச் சேர்ந்த 25 மீனவர்கள் கைது செய்யப்பட்டிருந்தனர்.

இவ்வாறு கைது செய்யப்பட்டவர்களில் ஒரு படகில் பயணித்த படகின் உரிமையாளர் உள்ளிட்ட 13 மீனவர்கள் கடற்றொழில் நீரியல் வளத்துறை அதிகாரிகளினால் நேற்று (22) பருத்தித்துறை நீதிமன்ற நீதவான் கிருசாந்தன் பொன்னுத்துரை முன்பாக முன்னிலைப்படுத்தப்பட்டு குற்றப்பத்திரிகை தக்கல் செய்யப்பட்டது.

எல்லை தாண்டி மீன்பிடியில் ஈடுபட்ட குற்றத்தை மீனவர்கள் ஒப்புக் கொண்டதையடுத்து 10 ஆண்டுகள் ஒத்தி வைக்கப்பட்ட 18 மாத சாதாரண சிறைத் தண்டனை என்னும் நிபந்தனையுடன் விடுதலை செய்து பருத்தித்துறை நீதிமன்ற நீதிபதி உத்தரவிட்டார்.

எனினும், கைது நடவடிக்கையின் போது மீனவர்களால் தாக்கப்பட்டு இலங்கை கடற்படையினர் மூவர் காயமடைந்தமை தொடர்பான விசாரணைகள் இன்னும் நிறைவுபெறாமையினால் விளக்கமறியலை நீடிக்குமாறு பருத்தித்துறை பொலிஸாரினால் நீதிமன்றில் கோரிக்கை முன்வைக்கப்பட்டது.

இதையடுத்து குறித்த 13 மீனவர்களையும் எதிர்வரும் 28 ஆம் திகதி வரை விளக்கமறியலில் வைக்குமாறு பருத்தித்துறை நீதிமன்ற நீதவான் கிருசாந்தன் பொன்னுத்துரை கட்டளை பிறப்பித்தார்.

ஏனைய 12 மீனவர்களுக்கெதிராக நீரியல்வள திணைக்கள அதிகாரிகளால் குற்றப்பத்திரம் தாக்கல் செய்யப்பட்டது.

படகின் உரிமையாளரையும் குறித்த வழக்கின் முதலாவது சந்தேகநபராக இணைத்து சந்தேகநபருக்கு இலங்கை வெளியுறவுத்துறை அமைச்சின் செயலாளரினூடாக அழைப்பாணை அனுப்புமாறு நீரியல்வளத்துறை திணைக்களத்தினரால் மன்றில் கோரிக்கைவிடப்பட்டது.

வழக்கை விசாரணை செய்த நீதவான் சந்தேகநபர்களை எதிர்வரும் 28ம் திகதி வரை விளக்கமறியலில் வைக்குமாறும் அன்றைய தினம் அழைப்பாணை அனுப்புவது தொடர்பில் கட்டளை பிறப்பிக்கப்படும் என்றும் உத்தரவிட்டார்.