பாதாளக் கிணறு உடைந்து விழுந்ததில் பலர் வைத்தியசாலையில்!

கண்டி பகுதியில் உள்ள விளையாட்டரங்கில் அமைக்கப்பட்டிருந்த பாதளக் கிணறு இடிந்து விழுந்ததில் எட்டு பேர் காயமடைந்துள்ளனர்.

வெசாக் பண்டிகையை முன்னிட்டு நேற்றுமுன்தினம் (23) வியாழன் திவுலபலஸ்ஸ, ரொட்டவெல பிரதேசத்தில் அமைக்கப்பட்டிருந்த பாதளக் கிணறே இவ்வாறு இடிந்து விழுந்துள்ளது.

இரவு காட்சி ஆரம்பிப்பதற்கு முன்னதாக பயணச் சீட்டு பெற்று பாதளக் கிணறு பார்ப்பதற்காக காட்சி முனை வரை சென்ற குழுவொன்று இந்த விபத்தை சந்தித்ததாக காவல்துறையினர் தெரிவித்தனர்.

விபத்தில் காயமடைந்த 50 வயதுடைய பெண் ஒருவரும் 13, 36, 40, மற்றும் 45 வயதுடைய நான்கு ஆண்களும் கிராதுருகோட் மற்றும் மஹியங்கனை வைத்தியசாலைகளில் அனுமதிக்கப்பட்டுள்ளதாக காவல்துறையினர் தெரிவித்தனர்.

விபத்து தொடர்பான மேலதிக விசாரணைகளை மஹியங்கனை காவல்துறையினர் மேற்கொண்டு வருகின்றனர்.