அஸ்வெசும நலன்புரி நன்மைகள் திட்டத்தின் முதற்கட்டத்தின் கீழ் மேன்முறையீடுகள் மற்றும் ஆட்சேபனைகளை சமர்ப்பிப்பதற்கான கால அவகாசம் எதிர்வரும் நவம்பர் 15ஆம் திகதி வரை நீடிக்கப்பட்டுள்ளதாக நலன்புரி நன்மைகள் சபை அறிவித்துள்ளது.
இது தொடர்பான அறிவிப்பை நலன்புரி நன்மைகள் சபை இன்று (11) வெளியிட்டுள்ளது.
பிரதேச செயலக மட்டத்தில் முன்வைக்கப்பட்ட கோரிக்கைகளைக் கருத்திற்கொண்டு, விண்ணப்பதாரர்கள் மற்றும் பொதுமக்கள் இணையவழியில் தமது மேன்முறையீடுகள் மற்றும் ஆட்சேபனைகளைச் சமர்ப்பிப்பதற்கு மேலதிக கால அவகாசம் வழங்கத் தீர்மானிக்கப்பட்டுள்ளது.
அஸ்வெசும திட்டத்தின் முதற்கட்டத்திற்குத் தகுதியான பயனாளர்களின் பெயர்ப் பட்டியல் கடந்த ஒக்டோபர் 28ஆம் திகதி வெளியிடப்பட்டிருந்தது. இதனையடுத்து, மேன்முறையீடுகள் மற்றும் ஆட்சேபனைகளைச் சமர்ப்பிப்பதற்கான இறுதித் திகதியாக இன்று (11) அறிவிக்கப்பட்டிருந்தது.
எனினும், கால அவகாசம் நீடிக்கப்பட்டுள்ள நிலையில், நவம்பர் 11ஆம் திகதி வரை இணையவழி கட்டமைப்பில் 143,805 மேன்முறையீடுகளும், பொதுமக்களிடமிருந்து 6,478 ஆட்சேபனைகளும் பதிவாகியுள்ளதாக சபை தெரிவித்துள்ளது.
2002ஆம் ஆண்டின் 24ஆம் இலக்க நலன்புரி நன்மைகள் சட்டத்தின் 11ஆவது பிரிவுக்கு அமைவாக, மேன்முறையீடுகள் மற்றும் ஆட்சேபனைகளைச் சமர்ப்பிப்பதற்கான நடைமுறை முன்னெடுக்கப்பட்டு வருகிறது.
இதற்கமைய, தகுதியுடைய விண்ணப்பதாரர்கள் மற்றும் பொதுமக்கள் தமது மேன்முறையீடுகள் மற்றும் ஆட்சேபனைகளை கீழ்வரும் உத்தியோகபூர்வ இணையத்தளத்தின் ஊடாகச் சமர்ப்பிக்க முடியும்.
இணையவழியில் விண்ணப்பங்களைச் சமர்ப்பிப்பதில் தொழில்நுட்ப உதவி தேவைப்படுவோர் தத்தமது பிரதேச செயலகங்களில் அமைந்துள்ள நலன்புரி நன்மைகள் தகவல் பிரிவை அணுக முடியும்.
மேலதிக தகவல்கள் மற்றும் உதவிகளுக்கு 1924 என்ற தொலைபேசி இலக்கத்துடன் தொடர்புகொள்ளுமாறும் நலன்புரி நன்மைகள் சபை பொதுமக்களைக் கேட்டுக்கொண்டுள்ளது.
