பிராந்திய சுகாதார ஒத்துழைப்பை மேலும் வலுப்படுத்தும் நோக்கில் இலங்கையில் நடைபெறும் BIMSTEC உறுப்பு நாடுகளின் முதலாவது சுகாதார அமைச்சர்கள் மாநாட்டின் தலைவராக சுகாதார மற்றும் ஊடகத்துறை அமைச்சர் வைத்தியர் நளிந்த ஜயதிஸ்ஸ தெரிவு செய்யப்பட்டுள்ளார்.
கொழும்பில் இன்று (11) முற்பகல் ஆரம்பமான இந்த மாநாட்டின் தலைமைத்துவப் பொறுப்பு இலங்கைக்கு வழங்கப்பட்டுள்ளதன் மூலம், பிராந்திய சுகாதார ஒத்துழைப்பில் நாட்டுக்கு முக்கிய இடம் கிடைத்துள்ளது.
இலங்கை, இந்தியா, பங்களாதேஷ், பூட்டான், நேபாளம், மியன்மார் மற்றும் தாய்லாந்து ஆகிய ஏழு நாடுகளின் பிரதிநிதிகள் பங்கேற்கும் இம்மாநாட்டில், பிராந்திய பொதுச் சுகாதாரப் பாதுகாப்பு, தொற்றுநோய்களைக் கட்டுப்படுத்துதல், சுகாதார அவசரநிலைகளை எதிர்கொள்வதற்கான தயார்நிலை மற்றும் மருத்துவத் தொழில்நுட்பப் பரிமாற்றம் உள்ளிட்ட முக்கிய விடயங்கள் தொடர்பில் கலந்துரையாடப்படுகின்றன.
மாநாட்டின் தலைவராக அமைச்சர் நளிந்த ஜயதிஸ்ஸ தெரிவு செய்யப்பட்டுள்ளதன் மூலம், பிராந்திய சுகாதாரக் கொள்கைகள் தொடர்பான கலந்துரையாடல்களை வழிநடத்துவதுடன், உறுப்பு நாடுகளுக்கு இடையிலான கூட்டு நடவடிக்கைகளை ஒருங்கிணைக்கும் பொறுப்பும் இலங்கைக்குக் கிடைத்துள்ளது.
இதேவேளை, கடந்த 2025 ஒக்டோபர் மாதம் கொழும்பில் நடைபெற்ற உலக சுகாதார அமைப்பின் 78ஆவது தெற்கு மற்றும் தென்கிழக்கு ஆசிய பிராந்தியக் குழுக் கூட்டத் தொடரில், அமைச்சர் நளிந்த ஜயதிஸ்ஸ அதன் பிராந்தியத் தலைவராகவும் நியமிக்கப்பட்டிருந்தார்.
அத்துடன், 2026 ஒக்டோபர் மாதம் தாய்லாந்தின் பாங்கொக் நகரில் நடைபெற்ற ஐந்தாவது ஆசிய – பசுபிக் அமைச்சர்கள் மாநாட்டின் உப தலைவராகவும் அவர் தெரிவு செய்யப்பட்டிருந்தமை குறிப்பிடத்தக்கது.
தொடர்ச்சியாகப் பல சர்வதேச மற்றும் பிராந்திய மாநாடுகளில் இலங்கைக்குத் தலைமைத்துவப் பொறுப்புகள் கிடைத்துள்ளமை குறிப்பிடத்தக்க விடயமாகும்.
