இலங்கையில் வருடாந்தம் சிறுவர் துஷ்பிரயோகம் தொடர்பாக சுமார் 10,000 முறைப்பாடுகள் கிடைப்பதாக தேசிய சிறுவர் பாதுகாப்பு அதிகாரசபையின் பணிப்பாளர் ஷானிகா மலல்கொட தெரிவித்துள்ளார்.
சிறுவர்களின் பாதுகாப்பு மற்றும் உரிமைகளை உறுதிப்படுத்தும் நோக்கில், சிறுவர்கள் தொடர்பான ஊடக அறிக்கையிடலுக்கான தேசிய வழிகாட்டல் கோவையொன்றை அறிமுகப்படுத்த அதிகாரசபை நடவடிக்கை எடுத்துள்ளது.
சிறுவர் பாலியல் துஷ்பிரயோகம், கொடூரமான நடத்தைகள், இணையவழி அச்சுறுத்தல்கள், இளம் வயதுக் கர்ப்பம் மற்றும் போதைப்பொருள் பாவனை உள்ளிட்ட பல்வேறு பிரச்சினைகளுக்கு சிறுவர்கள் முகங்கொடுத்து வருவதாக அவர் சுட்டிக்காட்டியுள்ளார்.
குறித்த வழிகாட்டல் கோவை தொடர்பாக அரசாங்க தகவல் திணைக்களத்தில் நடைபெற்ற ஊடகவியலாளர் சந்திப்பில் கலந்துகொண்டு கருத்துத் தெரிவிக்கும்போதே அவர் இதனைக் குறிப்பிட்டுள்ளார்.
இதேவேளை, இணையவழியில் சிறுவர்கள் எதிர்கொள்ளும் துஷ்பிரயோகங்கள் மற்றும் பாதுகாப்பு அச்சுறுத்தல்கள் அதிகரித்து வருவதாக இலங்கை கணினி அவசர தயார்நிலைக் குழுவின் (SLCERT) சிரேஷ்ட தகவல் பாதுகாப்புப் பொறியியலாளர் தெரிவித்துள்ளார்.
2025ஆம் ஆண்டில் சிறுவர்கள் தொடர்பாக 53 உணர்திறன்மிக்க டிஜிட்டல் ஊடகச் சம்பவங்கள் பதிவாகியிருந்த நிலையில், 2026ஆம் ஆண்டு நவம்பர் மாதமளவில் அந்த எண்ணிக்கை 180 ஆக அதிகரித்துள்ளதாக அவர் குறிப்பிட்டுள்ளார்.
குறிப்பாக, சமூக ஊடகங்களில் வருமானம் ஈட்டும் நோக்கில் சிறுவர்கள் தொடர்பான உள்ளடக்கங்கள் அதிகளவில் பயன்படுத்தப்படுவதாகவும், பெற்றோர் மற்றும் சமூகத்தினரின் போதிய விழிப்புணர்வின்மை காரணமாக சிறுவர்கள் பல்வேறு பாதிப்புகளுக்கு உள்ளாகும் அபாயம் அதிகரித்துள்ளதாகவும் அவர் மேலும் தெரிவித்துள்ளார்.
