அம்பாறையில் வளத்தாப்பிட்டி என்னும் ஊரில் சைவநெறிக்கூடமானது கடந்த யூலை (15) ஆம் திகதி செந்தமிழ் திருமறையில் தனது 5 ஆவது தமிழ் வழிபாட்டுக் கோவிலாக அருள் ஞானமிகு ஆதிசக்தி உடனாய ஆதிசிவன் திருக்கோவிலை உறுப்பு அமைப்பாக இணைத்துக் கொண்டு திருக்குடமுழுக்கு ஆற்றி வைக்கப்பட்டுள்ளது.
இந்த நிலையில் , குறித்த சைவநெறிக்கூடத்தை சுவிட்சர்லாந்துக்கான தூதர் சீரி வல்ரெர் நேரில் சென்று பார்வையிட்டுள்ளார்.
இதன்போது, பல்சமய இல்லத்தில் உறுப்பினராக சீரி வல்ரெர் சைவநெறிக்கூடத்தின் செயற்பாட்டினை கேட்டறியவும், இலங்கையில் வாய்ப்புள்ள நற்திட்டங்களை கூட்டாக நடைமுறைப்படுத்தவும் இந்த விஜயத்தினை மேற்கொண்டுள்ளார்.
இதனையடுத்து கருவறையில் ஆற்றும் செந்தமிழ் வழிபாட்டுத்தீர்மானம், அனைவரும் அருட்சுனையர் ஆகலாம் எனும் கோட்பாடு, குடிமைப்பாகுபாடு (சாதி) மறுப்பு, பெண்களும் அருட்சுனையராகலாம் எனும் முறைமை, அனைத்து மாந்தரும் கருவறை வரை சென்று வழிபடும் சீர்திருத்த சைவ எழுச்சி, போன்ற விடயங்கள் சிவருசி. சசிக்குமாரினால் சுவிட்சர்லாந்து தூதருக்கு விளக்கப்படுத்தப்பட்டுள்ளது.
இதேவேளை, இலங்கைப் போருக்கு பின்னர் தமிழ் மக்களின் நிலம், வழிபாட்டு இடங்கள், கோவில்கள் பலவகையில் வல்வளைப்பிற்கு ஆளாகுவதை தடுக்கும் பணிகளுக்கு சுவிஸ் அரசு தானாக முன்வந்து வெளிப்படையாக செயலாற்ற வேண்டும் எனும் கோரிக்கையினை சைவநெறிக்கூடம் தூதுவரிடம் முன்வைத்துள்ளது.
இந்த ஒன்று கூடலில் தூதருடன் யஸ்ரின் பொய்லாற் மற்றும் டோறிஸ் மனோர் ஆகிய பணிப்பாளர்களும் சைவநெறிக்கூடத்தின் சார்பாளராக சிவருசி. தர்மலிங்கம் சசிக்குமார் ஆகியோர் கலந்து கொண்டிருந்தனர்.
