யாழ்ப்பாணத்தில் நிலவும் கடுமையான காற்று மாசுபாடு மற்றும் பார்வைத் தெளிவின்மை காரணமாக, யாழ்ப்பாணம் – சென்னை இடையிலான விமான சேவைகள் இன்று (19) இரத்து செய்யப்பட்டுள்ளன.
காற்றின் தரம் மோசமடைந்துள்ளதால், யாழ்ப்பாணம் சர்வதேச விமான நிலையத்தில் விமானங்கள் பாதுகாப்பாகத் தரையிறங்குவதற்கும் புறப்படுவதற்கும் தேவையான பார்வைத் தெளிவு பாதிக்கப்பட்டுள்ளதாக தெரிவிக்கப்படுகிறது.
இதன் காரணமாகவே இன்று சென்னை – யாழ்ப்பாணம் இடையிலான விமானப் பயணங்கள் முன்னெடுக்கப்படவில்லை என அதிகாரிகள் குறிப்பிட்டுள்ளனர்.
இதேவேளை, யாழ்ப்பாணத்தின் காற்றுத் தரச் சுட்டெண் 200 என்ற அளவைக் கடந்துள்ளதுடன், இது ‘மிகவும் ஆரோக்கியமற்ற’ நிலையாக வகைப்படுத்தப்பட்டுள்ளதாக மத்திய சுற்றாடல் அதிகார சபை தெரிவித்துள்ளது.
வங்காள விரிகுடாவில் உருவாகியுள்ள ‘அக்வான்’ புயலின் தாக்கத்தினால் காற்றின் திசையில் ஏற்பட்ட மாற்றம் மற்றும் எல்லை தாண்டி பரவும் மாசடைந்த காற்று ஆகியவையே யாழ்ப்பாணம் உள்ளிட்ட நாட்டின் பல பகுதிகளில் காற்றின் தரம் வீழ்ச்சியடைவதற்குக் காரணம் எனவும் அந்த அறிக்கையில் சுட்டிக்காட்டப்பட்டுள்ளது.








