தீவில் தடுத்து வைக்கப்பட்டிருந்த அகதிகள் தற்கொலை முயற்சி!

டியாகோ கார்சியா தீவில் தடுத்துவைக்கப்பட்டுள்ள இலங்கையை சேர்ந்த புகலிட கோரிக்கையாளர்கள் பல்வேறு துன்பங்களுக்கு முகங்கொடுத்துள்ளனர். இவர்களில் 12 பேர் தவறான முடிவு எடுத்து உயிர்துறக்க முயன்றுள்ளனர் என பி. பி. சி. தெரிவித்துள்ளது. டியாகோ கார்சியாவில் கடந்த 20 மாதங்களாக தடுத்து வைக்கப்பட்டுள்ள இலங்கையை சேர்ந்த குடியேற்றவாசிகளே இவ்வாறு செயல்பட்டுள்ளனர்.

இந்து சமுத்திரத்தில் உள்ள பிரிட்டனுக்கு சொந்தமான சிறிய தீவில் இலங்கையை சேர்ந்த 89 குடியேற்றவாசிகள் சிக் குண்டுள்ளனர் என தெரிவித்துள்ள பிபிசி சட்டவிரோத பயணங்களின் போது படகுகள் ஆபத்தில் சிக்கியவேளைகாப்பாற்றப் பட்டவர்களே இவர்கள் எனவும் தெரிவித்துள்ளது. இராணுவத்தினருக்காக முன்னர் அமைக்கப்பட்ட கோவிட் கூடாரங்களிலேயே இவர்கள் தங்க வைக்கப்பட்டுள்ளனர் என நீதிமன்ற ஆவணங்கள் தெரிவித்துள்ளன.

டியாகோ கார்சியாவில் தான் பாலியல் துஷ்பிரயோகத்துக்கு உள்ளாகியுள்ளார் என்று பெண் ஒருவர் தெரிவித்துள்ளார். இதே நேரம் அங்கு உண்ணாவிரதப் போராட்டங்களும் நடக்கின்றன என்றும் தெரிவிக்கப்பட்டது.