ஜனாதிபதி ரணில் விக்கிரமசிங்கவுக்கும் ஆளும் கட்சி பாராளுமன்ற உறுப்பினர்களுக்கும் இடையிலான விசேட சந் திப்பு இன்று திங்கட்கிழமை மாலை 5.30 மணிக்கு நடைபெறவுள்ளது.
நாட்டில் தற்போதைய பொருளாதார, அரசியல் நிலவரங்கள் தொடர்பில் கலந்துரையாடுவதற்காக இந்த சந்திப்பு ஏற்பாடு செய்யப்பட்டுள்ளது. இது தவிர, ஆளுங்கட்சியின் பாராளுமன்ற உறுப்பினர்கள் மற்றும் அமைச்சர்கள் தாம் முன்னெடுத்துவரும் நடவடிக்கைகளில் எதிர்கொள்ள நேரிட்டுள்ள பிரச்னைகள் தொடர்பில் ஜனாதிபதியிடம் தெளிவு படுத்தவுள்ளனர்.
தற்போதுள்ள பிரச்னைகளை தீர்ப்பதுடன் 113 பெரும்பான்மை பலத்தை பாதுகாத்து அரசாங்கத்தின்
பணிகளை வலுவாக முன்னெடுத்துச் செல்வதும் இந்தக் கலந்துரையாடலின் மற்றுமொரு நோக்கமாகும். இதேவேளை கடந்த வாரம் ஜனாதிபதியுடன் இடம்பெற்ற சந்திப்பில், கடந்த காலத்தில் இடம்பெற்ற அரசாங்கத்துக்கு எதிரான ஆர்ப்பாட்டங்களின் போது தமது சொத்துக்களுக்கு சேதம் விளைவிக்கப்பட்டமை தொடர்பில் உரிய நடவடிக்கை எடுக்கப்படாமை குறித்து பொதுஜன பெரமுனவின் பாராளுமன்ற உறுப்பினர்கள் சிலர் கவலை வெளியிட்டிருந்தனர். இது தொடர்பில் முன்னேற்றம் ஏதும் ஏற்படவில்லை என்று கூறப்படுகின்றது. இது தொடர்பாகவும் இந்த சந்திப்பில் கவனம் செலுத்தப்படும் என எதிர்பார்க்கப்படுகிறது.
