மட்டக்களப்பை சேர்ந்த 06 வயது மாணவி காவ்யஸ்ரீ 200 எண்கணிதத் தொகைகளை 100% துல்லியத்துடன் 6 நிமிடங்கள் 51 வினாடிகளில் முடித்ததன் மூலம் குறிப்பிடத்தக்க சாதனையைப் படைத்துள்ளார். இந்த அசாதாரன சாதனை, மதிப்புமிக்க சோழன் புக் ஆஃப் வேர்ல்ட் ரெக்கார்ட்ஸில் ஒரு இடத்தைப் பெற்றுள்ளது.
இந்தநிலையில் புது டெல்லியில் நடைபெறவிருக்கும், 80 இற்கும் அதிகமான நாடுகள் பங்கேற்கவுள்ள அபாகஸ் என் கணித போட்டியில் கலந்து கொள்ள காவ்யஸ்ரீ இந்தியா பயணிக்கவுள்ளார்.
அவரது சிறப்பான சாதனையைக் கொண்டாடும் வகையிலும், ஊக்குவிக்கும் வகையிலும் தி டிராவலர் குளோபல் நிறுவனம் (THE TRAVELLER GLOBAL (PVT)LTD -மட்டக்களப்பு கிளை) காவ்யஸ்ரீக்கு டெல்லிக்கு செல்லவிருக்கும் பயணத்திற்கான விமான டிக்கெட்டை இலவசமாக வழங்கி அவரையும், அவரை போல சாதனை செய்ய துடிக்கும் சிறார்களுக்கும் ஒரு ஊக்கத்தை வழங்கியுள்ளது.
அதேசமயம் இந்தியாவில் இந்த போட்டிகள் மார்கழி மாதம் 14 , 15 ஆம் திகதிகளில் நடைபெறவுள்ளதுடன், இது தொடர்பில் தி டிராவலர் குளோபல் நிறுவனம் தெரிவிக்கையில், காவ்யஸ்ரீ தொடர்பில் தாம் பெருமிதம் கொள்வதாகவும் , மேலும் சாதனைகளை தொடரவும், புதிய எல்லைகளை ஆராய்வதிலும் இந்த வாய்ப்பு அவருக்கு துணைபுரியும் என்றும், அத்தோடு தனது நல்வாழ்த்துக்களையும் தெரிவித்துள்ளது.
