அநுராதபுர புனித நகரத்தின் புதிய அபிவிருத்தித் திட்டத்தில் ராமர் மற்றும் சீதையம்மன் கோவில்களை நிர்மாணிப்பதற்கு வழிவகுக்கும் வகையில் வாசகங்கள் சேர்க்கப்பட்டுள்ளதாக முன்னாள் அமைச்சர் உதய கம்மன்பில குற்றஞ்சாட்டியுள்ளார்.
போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்நாயக்கவினால் வர்த்தமானி மூலம் வெளியிடப்பட்டுள்ள புதிய அபிவிருத்தித் திட்டம் தொடர்பில், பிவித்துறு ஹெல உறுமய கட்சியின் தலைமையகத்தில் நடைபெற்ற ஊடகவியலாளர் சந்திப்பில் உரையாற்றும்போதே அவர் இதனைத் தெரிவித்துள்ளார்.
அநுராதபுர புனித நகரத்தில் ஏற்கெனவே சிவன் கோவில் ஒன்று காணப்படுவதாகக் குறிப்பிட்ட அவர், புதிய திட்ட அறிக்கையின் இரண்டாம் மற்றும் மூன்றாம் பக்கங்களில் புனித தலங்களை உள்ளடக்கி புனித நகரத்தை விரிவுபடுத்துவது தொடர்பான விடயங்கள் குறிப்பிடப்பட்டுள்ளதாகத் தெரிவித்துள்ளார்.
எனினும், அந்த இடங்களில் ‘பௌத்த புனித தலங்கள்’ அல்லது ‘தொல்பொருள் புனித தலங்கள்’ எனக் குறிப்பிடப்படாமல் பொதுவாக ‘புனித தலங்கள்’ என்ற சொல் பயன்படுத்தப்பட்டுள்ளதாக அவர் சுட்டிக்காட்டியுள்ளார்.
இதன் மூலம் அநுராதபுர புனித நகரத்தை அனைத்து மதங்களின் புனித தலங்களும் அமைந்துள்ள இடமாக மாற்றி, பௌத்தர்களின் புனிதப் பகுதியை சர்வமத மையமாக்க அரசாங்கம் முயற்சிப்பதாகவும் அவர் குற்றஞ்சாட்டியுள்ளார்.
மேலும், அபிவிருத்தித் திட்டத்தின் ஐந்தாம் பக்கத்தில் புனித நகரம் அதி வரையறைக்குட்பட்ட வலயம், சாதாரண வலயம் மற்றும் பொதுச் சேவை வலயம் என மூன்று பகுதிகளாகப் பிரிக்கப்பட்டுள்ளதாகக் குறிப்பிட்ட அவர், பொதுச் சேவை வலயத்தில் இடம்பெறும் வணிக நடவடிக்கைகள் பௌத்த மதக் கோட்பாடுகளுக்கு அமைவாக இருக்க வேண்டும் என்ற கட்டுப்பாடு திட்டத்தில் இடம்பெறவில்லை எனத் தெரிவித்துள்ளார்.
இதனால், புனித நகரப் பகுதியில் மதுபான விற்பனை நிலையங்கள், சூதாட்ட மையங்கள் மற்றும் மசாஜ் நிலையங்கள் உருவாகும் அபாயம் இருப்பதாகவும் அவர் எச்சரித்துள்ளார்.
எந்தெந்த கட்டுமானங்களுக்கு அனுமதி வழங்குவது, எவற்றுக்கு அனுமதி மறுப்பது என்பது தொடர்பான அதிகாரங்கள் நகர அபிவிருத்தி அதிகார சபைக்கு வழங்கப்பட்டுள்ளதாகவும் உதய கம்மன்பில மேலும் தெரிவித்துள்ளார்.
