களுவாஞ்சிக்குடி பிரதேசத்தில் தனியார் பஸ்வண்டி ஒன்றில் நடத்துனராக கடமையாற்றி வந்த இளைஞர் ஒருவர் பணத்தை திருடியதால் தென்னை மரம் ஒன்றில் கட்டிவைத்து அடித்து சித்திரவதை செய்த தனியார் பஸ்வண்டி உரிமையாளர் ஒருவரை நேற்று திங்கட்கிழமை (07) கைது செய்துள்ளதுடன் அந்த சம்பவத்துடன் தொடர்புடைய மற்றவர் தலைமறைவாகியுள்ளதாக பொலிசார் தெரிவித்தனர்.
இது பற்றி தெரியவருவதாவது,
களுவாஞ்சிக்குடி மகிளுர் பிரதேசத்தைச் சேர்ந்த தனியார் பண்வண்டி உரிமையாளரது கல்முனை மட்டக்களப்பு போக்குவரத்து சேவையில் ஈடுபட்டுவரும் பஸ்வண்டி உண்டியலில் இருந்த பணத்தை திருடிச் சென்ற சம்பவம் சிசிரிவி கமராவில் பதிவாகியுள்ளது. இவர் ஏற்கனவே இந்த தனியார் பஸ்வண்டியில் கடமையாற்றிய அம்பாறை மத்திய முகாம் பிரதேசத்தைச் சேர்ந்த 27 வயது நடத்துனரான இளைஞனே திருடியுள்ளதாக பதிவாகியுள்ளது.
இதனையடுத்து சம்பவதினமான நேற்று குறித்த இளைஞன் களுவாஞ்சிக்குடி பிரதேசத்திலுள்ள சாரதி ஒருவரின் வீட்டுக்கு சென்ற நிலையில் அங்கு சென்ற தனியார் பஸ்வண்டி உரிமையாளர் அவனை பிடித்து கையைகட்டிக் அங்கிருந்து கொண்டு சென்று ஒந்தாச்சிமடம் பிரதான வீதியிலுள்ள பாழடைந்த காணி ஒன்றிலுள்ள தென்னை மரம் ஒன்றில் கட்டிவைத்து கட்டையால் தாக்கி சித்திரவதை செய்துள்ளார்.
இதனை கண்ட பொதுமக்கள் கடும் கவலை தெரிவித்து பொலிசாருக்கு அறிவித்த நிலையில் சம்பவ இடத்துக்கு பொலிசார் சென்ற நிலையில் தாக்குதல் இடம்பெற்ற பகுதியில் கட்டிவைத்து அடித்தவர்கள் இல்லாததையடுத்து பொலிசார் திரும்பிச் சென்று இவ்வாறான சம்பம் இடம்பெறவில்லை என தெரிவித்தனர்.
இதேவேளை சம்பவம் இடம்பெற்ற போது ஊடகவியலார் ஒருவர் எடுத்த வீடியோ காட்சி ஊடகங்களில் வெளியானதையடுத்து பொலிசார் தாக்குதல் நடாத்திய பஸ்வண்டி உரிமையாளரை கைது செய்துடன் அவரை நீதிமன்றில் ஆஜர்படுத்த நடவடிக்கை முன்னெடுத்துள்ளதாகவும் தாக்குதலுடன் சம்மந்தப்பட சாரதி தலைமறைவாகியுள்ளதாகவும் பொலிசார் தெரிவித்தனர்.
இது தொடர்பான மேலதிக விசாரணைகளை களுவாஞ்சிக்குடி பொலிசார் மேற்கோண்டு வருகின்றனர்
