யாழில் முச்சக்கர வண்டிகளிற்கு டக்சி மீற்றர் பொருத்தப்பட்டு, பொலிஸாரால் ஸ்டிக்கர் ஒட்டப்படுதல் வேண்டும் என யாழ் மாவட்ட உதவி பொலிஸ் அத்தியட்சகர் தெரிவித்துள்ளார்.
யாழ்ப்பாணத்தில் இன்று ஊடகங்களுக்கு கருத்துத் தெரிவித்தபோதே அவர் இதனைக் குறிப்பிட்டுள்ளார்.
அவ்வாறு செய்யத் தவறும் முச்சக்கர வண்டிகளிற்கு உரிய நடவடிக்கை எடுக்கப்படும் எனவும் உதவி பொலிஸ் அத்தியட்சகர் தெரிவித்தார். இது தொடர்பில் அவர் மேலும் கூறுகையில்,எதிர்வரும் 15 ஆம் திகதிக்கு முன்னர் மீற்றர் பொருத்தப்பட வேண்டிய அனைத்து முச்சக்கர வண்டிகளிற்கும் மீற்றரை பொருத்தி 20,21,22 ஆகிய திகதிகளில் பொலிஸாரால் ஸ்டிக்கர்கள் ஒட்டப்படும்.
அது ஒட்டபட்ட பின்னரே செப்டெம்பர் மாதத்தில் இங்குள்ள தரிப்பு நிலையங்களில் நின்று முச்சக்கர வண்டிகளை செலுத்துவதற்குரிய சந்தர்ப்பங்கள் வழங்கப்படும்.
மீற்றர் பொறுத்தப்படாது மற்றும் பொலிஸ் ஸ்டிக்கர் இல்லாதும் ஓடப்படும் முச்சக்கர வண்டிகள் மீது பொலிஸாரின் கவனத்தை கொண்டு வருவதுடன் அதன் பின்னர் சட்ட நடவடிக்கையும் எடுத்தல் என்ற தீர்மானத்தை எட்டியுள்ளோம். ஆகவே, இது குறித்து நாளைய தினம் முதல் நடவடிக்கைகளை மேற்கொள்ளவுள்ளோம்.
இந்நிலையில் இன்றைய தினம் வெள்ளிக்கிழமை முச்சக்கர வண்டிகள் தரிப்பிடங்களுக்கு சென்று இது தொடர்பாக ஆலோசனை வழங்கவுள்ளோம். அதனையடுத்து, 20 ஆம் திகதி முதல் சட்ட நடவடிக்கை எடுக்கப்படும் செயற்பாடு அமுலுக்கு வரும் எனவும் தெரிவித்தார்.
