பெண் ஒருவரைக் கொலை செய்வதற்கு ஒப்பந்தம் செய்யப்பட்ட சந்தேக நபரொருவர் கடந்த 26 ஆம் திகதி கைது செய்யப்பட்டுள்ளதாகக் கொலை மற்றும் ஒழுங்கமைக்கப்பட்ட குற்றப் புலனாய்வுப் பிரிவினர் தெரிவித்துள்ளனர்.
குற்றப் புலனாய்வுத் திணைக்களத்தின் கொலை மற்றும் ஒழுங்கமைக்கப்பட்ட குற்றப் புலனாய்வுப் பிரிவினருக்குக் கிடைத்த தகவலின் பேரில் மேற்கொள்ளப்பட்ட சுற்றிவளைப்பில் சந்தேக நபர் காலி ஹபராதுவ ,மீபே பிரதேசத்தில் வைத்து கைது செய்யப்பட்டுள்ளார்.
காலி ஹபராதுவ பிரதேசத்தில் வசிக்கும் 26 வயதுடைய நபரொருவரே கைது செய்யப்பட்டுள்ளார்.
குறித்த பெண்ணை கொலை செய்வதற்கு ஒரு கோடி ரூபா தருவதாக கூறி வர்த்தகர் ஒருவர் கூறியதாக சந்தேக நபரிடம் மேற்கொள்ளப்பட்ட விசாரணையில் தெரியவந்துள்ளது.
வர்த்தகர் குறித்த பெண்ணை கொலை செய்வதற்கு ரி- 56 ரக துப்பாக்கிகளுக்குப் பயன்படுத்தப்படும் தோட்டாக்களையும் ஹெரோயின் போதைப்பொருளையும் சந்தேக நபருக்கு வழங்கியுள்ளதாக பொலிஸ் விசாரணையில் மேலும் தெரியவந்துள்ளது.
பிரதான சந்தேக நபரான வர்த்தகரைக் கைது செய்வதற்கு குற்றப் புலனாய்வுத் திணைக்கள அதிகாரிகள் விசாரணைகளை ஆரம்பித்துள்ளனர்.
இது தொடர்பான மேலதிக விசாரணைகளைக் குற்றப் புலனாய்வுத் திணைக்களத்தின் கொலை மற்றும் ஒழுங்கமைக்கப்பட்ட குற்றப் புலனாய்வுப் பிரிவினர் மேற்கொண்டு வருகின்றனர்.
