முன்னாள் அமைச்சர் ஒருவருக்கு சொந்தமானது என சந்தேகிக்கப்படும் மற்றுமொரு சொகுசு வாகனம் ஒன்று குற்றப் புலனாய்வுப் பிரிவினரால் கைப்பற்றப்பட்டுள்ளது.
நுகேகொட குற்றப் புலனாய்வுப் பிரிவினரால் குறித்த வாகனம் கொட்டாவ – லியங்கொட பிரதேசத்தில் வாகன திருத்துமிடம் ஒன்றில் நிறுத்தப்பட்டிருந்த வேளையில் கண்டுபிடிக்கப்பட்டுள்ளது.
இந்த வாகனம் கடந்த பெப்ரவரி மாதம் முன்னாள் அமைச்சரின் சாரதி ஒருவரினால் வாகன திருத்துமிடத்திற்கு கொண்டுவரப்பட்டுள்ளதாக ஆரம்பகட்ட விசாரணைகளில் இருந்து தெரியவந்துள்ளது.
வாகனம் கண்டுபிடிக்கப்பட்ட போது அதில் பதிவு இலக்கத் தகடுகள் இல்லை என குற்றப் புலனாய்வுப் பிரிவினர் தெரிவித்துள்ளனர்.
மேலும் இது தொடர்பிலான மேலதிக விசாரணைகளை காவல்துறையினர் மேற்கொண்டு வருவதுடன் கொட்டாவ காவல்துறையினரிடம் கைப்பற்றப்பட்ட வாகனம் ஒப்படைக்கப்பட்டுள்ளது.
இதேவேளை, முன்னாள் இராஜாங்க அமைச்சர் லொஹான் ரத்வத்த பயன்படுத்தியதாகக் கூறப்படும் போலி இலக்கத் தகடுடன் கூடிய ஜீப் வண்டி ஒன்று கைப்பற்றப்பட்டுள்ளது.
தெல்தெனிய காவல்துறையினருக்குக் கிடைத்த தகவலுக்கு அமைய, குறித்த வாகனம் கைப்பற்றப்பட்டுள்ளதாக தெரிவிக்கப்பட்டுள்ளது.
