இலங்கையில் காலியான மதுபானப் போத்தல்களின் உற்பத்திச் செலவு அதிகரித்துள்ளதைத் தொடர்ந்து, மதுபான உற்பத்தி நிறுவனங்கள் தமது தயாரிப்புகளின் விலைகளை அதிகரித்துள்ளன. இந்தப் புதிய விலை மாற்றம் நவம்பர் முதலாம் திகதி முதல் நடைமுறைக்கு வந்துள்ளதாகத் தெரிவிக்கப்படுகிறது.
கண்ணாடிப் போத்தல்களை உற்பத்தி செய்யும் நிறுவனத்தினால் உற்பத்திச் செலவு அதிகரிக்கப்பட்டுள்ளதால், மதுபான உற்பத்தியாளர்களுக்கு மேலதிக செலவுகள் ஏற்பட்டுள்ளதாகக் கூறப்படுகிறது.
இதன்படி, 750 மில்லிலீற்றர் காலிப் போத்தலின் விலை 160 ரூபாவாகவும், 375 மில்லிலீற்றர் போத்தலின் விலை 140 ரூபாவாகவும், 180 மில்லிலீற்றர் போத்தலின் விலை 109 ரூபாவாகவும் உயர்ந்துள்ளது.
இதனையடுத்து, காலிப் போத்தல்களை மீளப் பெற்றுக்கொள்ளும் மதுபான விற்பனை நிலையங்களில் அறவிடப்படும் வைப்புத் தொகையும் அதிகரிக்கப்பட்டுள்ளது.
முன்னதாக 750 மில்லிலீற்றர் போத்தலுக்கு 60 ரூபாவாக இருந்த வைப்புத் தொகை தற்போது 100 ரூபாவாகவும், 375 மில்லிலீற்றர் போத்தலுக்கு 40 ரூபாவாக இருந்த தொகை 70 ரூபாவாகவும், 180 மில்லிலீற்றர் போத்தலுக்கு 20 ரூபாவாக இருந்த தொகை 30 ரூபாவாகவும் உயர்த்தப்பட்டுள்ளது.
இதன் காரணமாக, இலங்கையில் அதிகளவில் விற்பனையாகும் ‘கல்’ (Gal) மதுபானத்தின் 750 மில்லிலீற்றர் போத்தலின் விலை, 100 ரூபா வைப்புத் தொகையையும் உள்ளடக்கி தற்போது 3,800 ரூபாவாக அதிகரித்துள்ளது.
இந்தத் தொகையில் 360 ரூபா மதுபான விற்பனை நிலையங்களுக்கான பங்காகவும், சுமார் 611 ரூபா மதிப்புக்கூட்டு வரியாகவும் (VAT) செல்வதாக உற்பத்தி நிறுவனங்கள் சுட்டிக்காட்டியுள்ளன.
அதேவேளை, காலிப் போத்தல்களை மீளப் பெற்றுக்கொள்ளாத நிறுவனங்கள், அவற்றைக் கொள்வனவு செய்வதற்கான மேலதிக செலவுகளை மதுபானத்தின் விலையுடன் சேர்த்து நுகர்வோரிடம் அறவிடத் தீர்மானித்துள்ளன.
மதுவரி அதிகரிக்கப்படாத நிலையிலும், போத்தல்களின் உற்பத்திச் செலவு உயர்ந்துள்ளதால் ஏற்பட்டுள்ள மேலதிக செலவுகளை நுகர்வோரிடம் அறவிடுவதைத் தவிர வேறு வழியில்லை என மதுபான உற்பத்தி நிறுவனங்கள் தெரிவித்துள்ளன.
