அமெரிக்க ஜனாதிபதியாகத் தெரிவு செய்யப்பட்ட டொனால்ட் ட்ரம்ப், எதிர்வரும் 20ஆம் திகதி, அமெரிக்காவின் 47ஆவது ஜனாதிபதியாக பதவியேற்கவுள்ளார்.
இந்நிலையில் ட்ரம்ப் ஜனாதிபதியாக இருந்த காலகட்டத்தில், கடந்த 2016ஆம் ஆண்டு தேர்தல் நிதியை முறைகேடாக கையாண்ட வழக்கில் அவர் குற்றவாளியென 12 ஜூரிகள் அடங்கிய குழு அறிவித்தது. அதாவது தன்னுடனான பாலியல் தொடர்பை மறைக்க ஆபாசப்பட நடிகை ஸ்டோமி டேனியல்ஸுக்கு சுமார் 1.3 இலட்சம் டொலர்களை 2016ஆம் ஆண்டுக்கான தேர்தல் பிரசார நிதியிலிருந்து கொடுத்ததாக சொல்லப்பட்டது.
இவ்வழக்கின் விசாரணைகள் முடிவுற்ற நிலையில் நியூயோர்க் நீதிமன்ற நீதிபதி ஜுவான் மெர்ச்சென் பிறப்பித்த உத்தரவில், ‘ட்ரம்புக்கு எதிரான வழக்கில் எதிர்வரும் 10ஆம் திகதி தீர்ப்பு மற்றும் தண்டனை விபரங்கள் வெளியிடப்படும்’ என்று அறிவித்துள்ளார்.
நீதிபதியின் இந்த உத்தரவு, அமெரிக்க ஜனாதிபதியாக பதவியேற்கவிருக்கும் ட்ரம்புக்கு கடும் நெருக்கடியை ஏற்படுத்தியுள்ளது. அவரது கட்சியான குடியரசு கட்சியும் அதிர்ச்சியடைந்துள்ளது. எவ்வாறாயினும், ட்ரம்ப் சிறைக்குச் செல்ல வேண்டிய அவசியம் ஏற்படாது. அவர் பிணையில் விடுவிக்கப்படுவார் என்றும் தெரிவிக்கப்பட்டுள்ளது. எவ்வாறாயினும் அவர் மீதான குற்றம் உறுதி செய்யப்பட்டதால், தண்டனை பெற்ற ஒருவர் ஜனாதிபதியாக பதவியேற்கும் சூழல் ஏற்படும் எனவும் சுட்டிக்காட்டப்பட்டுள்ளது.
